Azərbaycanda avtomobil sürücüləri, taksi xidmətləri, xüsusilə də UBER və BOLT kimi şirkətlər ünvanlara gedərkən əsasən WAZE naviqator proqramından istifadə edirlər. Sürücülər bildirirlər ki, məhz bu proqram şəhərdə tıxacların azalmasında əhəmiyyətli rol oynayır, maşın yükünü boş yollara yönəldir. Trafik vəziyyəti real vaxt rejimində izləməyə imkan verən, sürət radarlarının yerini öyrənməyə yardımçı olan, istifadəçilərə yol şəraitindəki dəyişikliklər, maneələr, polis haqqında məlumat verən və digər istifadəçilərlə ünsiyyət qurma imkan yaradan WAZE naviqator proqramı İsrail startapçıları tərəfindən yaradılıb. 2008-ci ildə Uri Levine, proqramçı mühəndis Ehud Shabtai və Shinar bü gün bütün sürücülərin istifadəsində olan tətbiqi hazırlayıblar. Lakin 2013-cü ilin iyun ayında Google şirkəti WAZE proqramını 1,1 milyard dollar məbləğində satın alıb.

Sözügedən proqram Windows Phone, iOS, Android, Windows Mobile, Symbian və BlackBerry mobil platforma istifadəçiləri üçün əlçatandır.

Maraqlıdır ki, sürücülərin əksəriyyəti niyə WAZE naviqator proqramını seçirlər?

PEŞƏKAR şirkətinin təsisçisi, startapçı Nail Seyidov hesab edir ki, WAZE naviqator proqramının istifadəçi interfeysi olduqca rahatdır: "Bu gün Azərbaycan avtomobil sürücülərinin istifadəsində WAZE ilə yanaşı, Google Maps, Yandex, öz milli rəqəmsal naviqator proqramımız olan AzNav tətbiqləri olsa da onların çoxu WAZE proqramına üstünlük verirlər. Məncə, bu ilk olaraq sözügedən proqramın istifadəçi interfeysinin rahat olması ilə bağlıdır. Həmçinin WAZE tətbiqində cüzi data istifadə olunur. Düşünürəm ki, Google Maps funksionallıq baxımından WAZE tətbiqindən daha yaxşıdır. Amma şəxsi araşdırmamdan deyə bilərəm ki, Azərbaycanda ən çox yerli istehsal olan AzNav naviqator xidmətindən və WAZE tətbiqindən daha çox istifadə edirlər. Bunun əsas səbəbi istifadəçi interfeysinin olduqca rahat olmasıdır".