Pos terminalların kütləvi tətbiqi üçün əhatə dairəsini genişləndirmək lazımdır. Dövlət proqramı çərçivəsində mərhələ-mərhələ hər yerin post terminallarla təmin olunması istiqamətində işlər görülməlidir".

Bu sözləri TED.az-a açıqlamasında iqtisad elmləri doktoru, professor Fikrət Yusifov deyib. 

O bildirdi ki, təbii ki, bu yöndə son illər pozitiv addımlar atılıb və müəyyən nəticələr hasil olunub: "Ancaq Azərbaycanda, xüsusilə də Abşeron yarımadasında yerləşən böyük bazarlarda post terminallar tətbiq olunmur. Təbii ki bu da kölgə iqtisadiyyatının olmasına şərait yaradır. Eyni zamanda vergidən yayınmaya çox ciddi yol açır. Lökbatan ətrafında yüz milyonlarla dövriyyəsi olan böyük bazarlar var ki, heç birində pos terminallardan istifadə olunmur. Ticarətlə məşğul olan insanlar pos terminalın nə olduğunu bilmirlər, təsəvvürləri də yoxdu. Ona görə də əhatə dairəsini genişləndirmək lazımdır. Hər yerdə tətbiq olunmalıdır". 

Ekspertin sözlərinə görə, pandemiya da bu işlərə bir qədər əngəl yaratdı: "Düşünürəm ki post-pandemiya dövründə bu məsələlərlə bağlı qəti qərarlar qəbul edib post terminalların əhatə dairəsini genişləndirmək lazımdır". 

Pos terminalların olmaması və ya nağdsız ödənişi qəbul etməkdən imtinaya görə obyekt sahibinin 6 min manatadək cərimələnməsinə gəlincə isə Fikrət Yusifov hesab edir ki, bu cəzalandırmaq üçün bir vasitədir: “Təbii ki, bunun da nəticəsi olacaq. Amma meyvə bazarı, geyim və texnika ilə bağlı, kənar dairəvi yolda inşaat materialları bazarı kimi böyük ticarət dövriyyəsi olan zonalar var ki, söhbət bu məkanların işə cəlb edilməsindən gedir. Zonada ümumiyyətlə post terminal yoxdursa, onu tətbiq etmədiyinə görə heç kim cərimələnmir. Yoxsa təbii ki post terminalların olmamasına görə hər hansı market cərimələnirsə, inzibati qaydada məsuliyyətini qaldırmaq üçün yaxşı haldır".

Günel QURBANOVA