Dərsliklərdə erməni bayrağının rənglərinin olması iddiasına dair Təhsil Nazirliyi açıqlama verib.

TED.az-ın xəbərinə görə, qurumun açıqlamasında bildirilir ki, sosial şəbəkələrdə yayılmış erməni bayrağının rənglərinin əks olunduğu iddia edilən kitabların heç biri dərslik deyil, Təhsil Nazirliyi tərəfindən nəşr olunmayıb: "Təhsil Nazirliyinin məktəblər üçün nəşr etdirdiyi bütün dərsliklərlə www.trims.edu.az saytının “Qrifli dərsliklər” bölməsində tanış olmaq mümkündür". 

Qeyd olunur ki, təhsil sahəsi və dərsliklər ictimaiyyətin daim maraq dairəsində olduğundan bəzi maraqlı şəxslər vaxtaşırı olaraq belə köhnəlmiş və ya uydurma məlumatları yaymaqla insanlar arasında süni ajiotaj və narazılıq yaratmağa cəhd edirlər: "Çünki bir çox insan yayılan xəbəri araşdırmadan onu mütləq həqiqət kimi qəbul edir. Təhsil Nazirliyi geniş ictimaiyyətdən dərsliklər barədə yayılan xəbərlərin doğruluğunu www.trims.edu.az saytı vasitəsilə yoxlamağı xahiş edir".

Açıqlamada o da vurğulanır ki, istənilən kitab nəşriyyat məhsulu hesab edilir: "Onun hazırlanması zamanı mövcud qanunvericiliyə əsasən, nəşr üçün nəzərdə tutulmuş materialların senzurasına yol verilmir. Hər bir hüquqi və ya fiziki şəxs nəşriyyat məhsulunun sifarişçisi ola bilər”.