Microsoft korporasiyası kompüterlərin zəifləməsinə səbəb olan problemli Windows 10 əməliyyat sisteminin yenilənməsini ləğv edib.

TED.az xarici KİV-ə istinadən xəbər verir ki, Microsoft tərəfindən KB4559309 sistem yenilənməsinin KB4576754 ilə əvəzlənməsi barədə qərar qəbul edilib. Yeni sistem yenilənməsi də məcburidir və köhnəlmiş Internet Explorer brauzerini Edge ilə əvəzləyir.

Windows texniki dəstək mütəxəssisi bildirir ki, bu sistem yenilənməsi əvvəllər buraxılan KB4541301, KB4541302 və KB4559309 yenilənmələrini əvəzləyəcək.

Yenilənmə sənədlərinə görə, KB4576754 avtomatik yükləniləcək – onun yüklənilməsi üçün istifadəçinin iştirakı tələb olunmur. 

Korporasiya nümayəndələri qeyd ediblər ki, hazırda onlar KB4576754 yenilənməsi ilə əlaqədar nasazlıqlar barədə məlumata malik deyillər.

Bir müddət əvvəl Microsoft yaz yenilənmələrindən birində problemin olduğunu etiraf edib. 

Mütəxəssislər vurğulayıblar ki, korporasiya yenilənmənin quraşdırılmasını dayandırıb və istifadəçilərdən onun səbəb olduğu problemlər barədə informasiya toplayır. 

İyunun sonunda Windows 10 istifadəçiləri kompüterlərin yüklənmə vaxtının artmasına və oyunlarda ekranda göstərilən kadrların saniyə sayının azalmasına səbəb olan KB4559309 yenilənməsindən şikayətləniblər.