AZ

Milli onlayn təhsil platforması yaradılacaqmı? – “Teams-da toplanan  məlumatı Azərbaycan idarə edir”

 

117540146_965602033889946_8429606540161131510_n
25.09.2020 09:40

Azərbaycanda bütün təhsil müəssisələrində tədris Microsoft Teams platforması üzərindən aparılır. Çoxları data bazanın Microsoft-da qalmasını əsas gətirərək milli onlayn təhsil platformasının yaradılması fikrini irəli sürürlər.

 

Maraqlıdır, buna nə dərəcədə ehtiyac var? Ümumiyyətlə, milli onlayn tədris platforması ölkəmizə nə qazandırar?

 

Mövzu ilə bağlı TED.az-a danışan Microsoft Azerbaijan şirkətinin baş meneceri Qaçay Mirzəyev xatırladıb ki, platformada hər qurumun öz mühiti var: “Bu alətin Microsoft-a aid olmasına baxmayaraq, mühit Azərbaycan mühitidir. Orada toplanan bütün məlumatı Microsoft deyil, Azərbaycan idarə edir. Bu məsələdə idarəedici konkret olaraq Təhsil Nazirliyidir. Amma təhsil müəssisələrinin istifadə etdiyi alternativ platformalar da var. Onların müqayisə və analitikası nəticəsində Teams daha uyğun hesab edilib və tərəflər, təhlükəsizlik, miqyaslaşa bilən imkanlar, müəllim-şagird ünsiyyətinə daha uyğun olduğu üçün seçilib. Milli təhsil platformasının hazırlanması isə bir günün işi deyil. Yaxın gələcəkdə belə bir platforma realdır və olması gözlənilir. Amma bunu harada miqyaslaşdıracaqlar? Milyon adamı oraya necə köçürəcəklər? Bu, nə qədər xərc aparacaq?”

 

 

Q.Mirzəyev vurğulayıb ki, hazırda Təhsil Nazirliyi Microsoft Teams-dan tam pulsuz istifadə edir: “Tərəzinin bir gözünə indi əldə etdiyimiz imkanları, digər gözünə isə çəkiləcək xərclər, gözləyəcəkləri vaxt və sonradan dəstəklənmə xərcini qoyun. Bunları nəzərə alsaq, hazırda bunu obyektiv görümürəm. Düşünürəm ki, nazirliyin elə Microsoftun təmənnasız verdiyi imkanı inkişaf etdirməsi daha məqsədəuyğundur, nəinki, yenidən Amerika kəşf etməsi. Təhsil Nazirliyi Microsoftun uzunmüddətli partnyorudur. Burada qazanc güdmürük, məqsədimiz təhsilə dəstək olmaqdır. Cənab Prezidentlə olan videozəngdə də bunu öhdəlik kimi üzərimizə götürmüşük. Əməkdaşlıq davam etdiyi müddət ərzində Təhsil Nazirliyinə verilən sistem ödənişsiz olaraq qalacaq. Pulsuz və keyfiyyətli sistem əllərində olduğu halda niyə məhdud büdcələrini eyni şeyin yenisini düzəltməyə sərf etməlidirlər? Fikrimcə, Təhsil Nazirliyi bu büdcəni məzmun hazırlanmasına yönəldə bilər. Müəllimlərin keyfiyyətli məzmun hazırlamaq üçün elə də güclü imkanları yoxdur. Bacardıqları kimi dərs keçir, qeydə alıb şagirdlərə göstərirlər. Bu, bəzən keyfiyyətsiz olur. Buna görə də, büdcəni məzmun, müəllimlərin səriştəliliyi və biliyinin artırılmasına yönəltsələr daha faydalı olar”.

 

Lamiyə SÜLEYMANLI

Texnologiya bölməsindən digər xəbərlər

Daha çox