Azərbaycanın tarixi ərazilərini separatçılıq yolu işğal altında saxlamaq istəyən məkrli düşmən 30 ilə yaxındır ki, müxtəlif müdafiə sistemləri qurub. Ancaq müasir döyüş texnikası ilə düşmənin istənilən müdafiə xəttini yarmağa qadir olan ordumuzun silahlanmasına daha effektiv mübarizə üçün Türkiyənin Karqu (Avtonom Dönər Qanadlı Vurucu PUA) dronları da əlavə olunacaq.

TED.az-ın məlumatına görə, Karqu kiçikölçülü, üzərində silah daşıya bilən drondur. Mənası "dağ başındakı müşahidə qülləsi", və ya "qırğı" deməkdir. “Dönər qanadlı kamikadze dron" olaraq da adlandırılır. Avtonom və ya uzaqdan pult ilə işləyə bilir. Xüsusi özəlliyi ondan ibarətdir ki, assimmetrik əməliyyatlarda və döyüşlərdə riskli bölgələrə daxil ola bilir və əsgərlər daxil olmadan öncə bölgəyə girərək təhdidləri aradan qaldırır. Gecə və gündüz fəal əməliyyat aparma, hərəkət edən hədəflərə yönlənmə xüsusiyyətlərinə  malikdir. Hansısa idarəetmə mərkəzinə ehtiyac duymur. Meydandakı əsgər tərəfindən rahatlıqla istifadə olunur.

Həmin dronlar vasitəsilə hərbi əməliyyatlar insan itkisini əhəmiyyətli dərəcədə azaldır. Eyni zamanda düşmənin texnika və canlı qüvvəsinin neytrallaşdırılması baxımından da böyük əhəmiyyət kəsb edir. 

Xatırladaq ki Müdafiə Texnologiyaları Mühəndislik və Ticarət şirkəti tərəfindən tamamilə yerli imkanlar daxilində istehsal olunmuş "Karqu” adlı kamikadze dronların bu ilin mart ayında Türkiyə Silahlı Qüvvələrinin  xidmətinə verilməsi və bununla da sözügedən dronların Azərbaycan ordusunda da peyda ola biləcəyi ehtimalı Ermənistanı çox böyük qorxuya salmışdı.

5 km məsafədən idarə oluna bilən fırlanan qanadlı vurucu PUA-ların vəzifə müddəti 10 dəqiqə, maksimum hündürlüyə qalxma məsafəsi 1000 metrdir. Çəkisi 6,285 qram olan bu pilotsuz uçuş aparatları 72 km/ saat-a qədər sürətlə hərəkət edə bilir.  Sistem "Vurucu Dönər Qanadlı PUA” və "Yer Nəzarət Məntəqəsi" komponentlərindən ibarətdir. Özünü məhvetmə qabiliyyəti ilə yanaşı, hədəfi də tənzimlənən yüksəklikdə məhv edə bilir.

PUA həm tək, həm də sürü halında istifadə edilir. Sürüdə hərəkət edərkən, digər Karqu vasitələri ilə formalaşma uçuşu meydana gətirir.

PUA-nın sürü halında hücum etməsi onun Hava Hücumundan Müdafiə sistemləri tərəfindən zərərsizləşdirilməsini müşkülə çevirir. 

Qeyd edək ki, Türkiyə Ordusu Rusiya tərəfindən dəstəklənən Bəşər Əsəd rejiminə qarşı bu dronlardan məharətlə istifadə edib. Rusiyadan alınan ən son müdafiə sistemləri belə bu dronların qarşısında aciz qaldı. 

Günel QURBANOVA