Azərbaycan Ordusunun silahlanmasında yer alan daha bir avtomobil Tufan zirehli hərbi maşınıdır. Tufan Azərbaycanın Müdafiə Sənayesi Nazirliyi tərəfindən istehsal edilib və dizayn olunub.

TED.az xəbər verir ki, Tufan zirehli maşını ilk dəfə 4 il əvvəl ikinci Azərbaycan beynəlxalq avtomobil sərgisində maket və 3D animasiya formatında nümayiş etdirilib. Amma avtomobilin seriyadan əvvəlki prototipi gövdə forması və bəzi detallara görə, konseptdən bir qədər fərqlidir. Zirehli maşının yalnız aqreqat və şassi hissələrində donor detallardan istifadə olunub. 

Texniki göstəricilər

Tufanın ağırlığı 12,3 tona çatır. 10 nəfərlik şəxsi heyəti tam təhlükəsiz şəraitdə 3 tona qədər yük ilə daşımaq qabiliyyətinə malikdir. Maşın NATO-nun STANAG 4569 ballistik qoruma standartının 3-cü səviyyəsinin tələblərinə uyğundur.

Şosedə saatda 85 kilometr sürətinə çatan maşın, həm də 65 sm dərinlikdəki xəndək və 1,2 metr su maneələrini keçə bilir. 

Tufanın dəf edilən eniş və yoxuşunun səviyyəsi 30, yamacı isə 18 dərəcədir. Zirehli maşının yerində dönmə radiusu 20 metrə çatır və uzunluğu 7,3, eni 2,44, hündürlüyü isə 2,8 metrdir. Tufanın gövdəsi universal formatda layihələndirilib. Maşının güc aqreqatı kimi 8 və ya 12 silindirli 230-dan 550 at gücünə qədər istənilən dizel, turbodizel mühərrikləri və transmissiyalar tətbiq oluna bilər.