"Keçən iki il ərzində İnnovasiyalar Agentliyinin mübadilə proqramları əsasən ABŞ, İsrail, Hindistan, Ukrayna, Macarıstan, Belarus və BƏƏ ölkələrində həyata keçirilib".

Bu barədə TED.az-a açıqlamasında Azərbaycan İnnovasoya Agentliyinin mətbuat xidmətindən bildirilib.

Məlumatda qeyd olunur ki, mübadilə proqramlarında əldə olunmuş təcrübə əsasən startapların inkişafina yönləndirilib: "Həm İKT, həm də innovativ həllər sahəsində mübadilə proqramları zamanı əldə olunmuş təcrübə əsasında yeni məhsullar üzərində işlər başlanmış, yerli layihələrin xarici şirkətlərlə əməkdaşlıq münasibətləri qurulmuş, müqavilələr imzalanıb. Buna nümunə olaraq, Zərbə, IQrex, Custom AR, Vriendly, Virtual Cərrahiyyə startap layihələrini göstərmək olar".

Hansı ölkələrlə bu kimi mübadilə proqramlarının həyata keçirilməsi planlaşdırılır sualına gəlincə, Agentlikdən bildirib ki, 2021-ci il ərzində İKT və yüksək texnologiyalı layihələrin inkişafı, digər bazarlara inteqrasiya yolları ilə tanışlıq, eləcə də uyğunlaşdırma üçün ilkin olaraq əsasən dörd istiqamətdə mübadilə proqramlarının həyata keçirilməsi nəzərdə tutulub: "İlin sonunadək başqa mübadilə proqramları da planlaşdırılır. Birincisi, ABŞ mübadilə proqramı, yəni layihələri Birləşmiş Ştatlarda olan maliyyə institutları və onların geniş bazar və bazarlama imkanları ilə tanış etmək məqsədi daşıyan mübadilə proqramı. İkincisi, Çin mübadilə proqramı. Layihələri Çində olan böyük bazarda iş prinsipləri, layihələrin inkişafı ilə İnnovativ həllərin inteqrasiya, tətbiqi və birgə layihələrin həyata keçirilməsi məqsədli mübadilə proqramıdır. Üçüncüsü, Koreya mübadilə proqramı. Burada layihələri uzun müddətli planlama, hazırlıq mərhələlərini elmi təhqiqat əsasında aparılması və gələcəyə baxış sahələrində tanışlıq məqsədilə nəzərdə alınıb. Dördüncüsü isə İsrail və Avropa ölkələri ilə birgə mübadilə proqramlarında inkişaf proqramların tətbiqi və layihələrin inteqrasiya baxımında səmərəli nəticə alınması üçün vacib rolları olacaq".

Zeynəb ƏKBƏR