TED.az "Müharibə dövrü sosial şəbəkələrdə" rubrikasında Vətən müharibəsi ilə bağlı paylaşımlardan bəzilərini təqdim edir:

Ramin Quluzadə 

Xəbərdarlıq: düşmən əks-təbliğat aparmaq məqsədilə məlumat əldə etməyə çalışır

Ermənistan tərəfi öz uğursuzluqlarını pərdələmək üçün saxta xəbərlər yaymaqda davam edir. Belə ki, düşmən tərəfi əks-təbliğat aparmaq məqsədilə müxtəlif kanallar – “WhatsApp”, “Telegram”, sosial şəbəkələr üzərindən vətəndaşlarımıza yazaraq özlərini bizdən biri kimi qələmə verir və guya qələbəyə həsr olunmuş film çəkilişində istifadə etmək üçün əldə olan videogörüntülərin təqdim edilməsini istəyirlər. Bunun qarşılığında isə vətəndaşlara müəyyən pul məbləği təklif edilir. 

Məqsəd Azərbaycan əleyhinə məlumatlar yaymaqla əks-təbliğat aparmaqdır.

Vətəndaşlardan xahiş olunur ki, tanımadığı şəxslərdən gələn bu cür mesajlara etimad edib qarşı tərəfə informasiya ötürməsinlər, fərdi məlumatlarını təqdim etməsinlər və bu kimi mesajları ''spam'' olaraq şikayət etsinlər. Həmçinin bu kimi hallarla üzləşdikdə www.cert.az saytı və ya reports@cert.az elektron poçt ünvanı vasitəsilə Nəqliyyat, Rabitə və Yüksək Texnologiyalar Nazirliyi yanında Elektron Təhlükəsizlik Xidmətinə məlumat versinlər.

Rizvan Qənbərli 

Bu gün Zəfər paradı təkcə ölkə tarixində ilk hadisə deyildi. Bu gün öz tarixi ilkini yaşayanlardan biri də Azadlıq meydanı idi. 

Azadlıq meydanı həmişə qəzəbin dili olub, ədalət axtarışına tərcümanlıq edib, haqsızlığa üsyanın səsi olub. Azadlıq meydanı orta əsrlərin Avropa meydanları kimi meydan oxuyanların cəzalandırıldığı yer olub. Azadllq meydanında haqsızlığa meydan oxuyanlar ilk dəfə bu gün mükafatlandırıldı. Meydan ilk dəfə bu gün sakit idi, hirsi soyumuşdu, qəzəbi keçmişdi. İlk dəfə bu gün şad, coşğulu və qalib idi.

Azadlıq meydanı milli müstəqillik mübarizəmizin başladığı yerdir. İlk dəfə 1988-ci ildə qarşısında yerləşdiyi Hökumət evindəki nomenklaturaya etiraz edənlərin mitinqi ilə tarixə düşdü. Xalq hərəkatı bu meydanda elə meydan hərəkatı kimi başladı. Milli dirçəliş günümüzün tarixinə hopmuş kütləvi dirənişin məkanı oldu. Müstəqillik mübarizəmizin dili oldu. Xalq Moskvaya etiraz etdi, bu meydana üz tutdu. Xalq 20 yanvarda Qızıl Ordunun qətl etdiyi qəhrəmanlarını bu meydandan Şəhidlər Xiyabanına uğurladı. Müstəqilliyini qazanmaq üçün meydana çıxdı, amma müstəqilliyini bu meydanda bayram edə bilmədi. 

Müstəqilliyini qazanan xalq öz hökumətinə etiraz etdi, Azadlıq meydanına üz tutdu. Müxalifət iqtidara gəlmək istədi, Azadlıq meydanına çıxdı. General Polad Həşimovun ölümündən qəzəblənib müharibə istədi, yolunu bu meydandan saldı. Daha əvvəl bu meydanda təşkil olunan hərbi paradlar olsa da, o paradda iştirak edənlər də, onlara tamaşa edənlər də özünü qalib kimi hiss edə bilmədi. 

Onların heç biri bu gün Azadlıq meydanındakı qələbə coşğusunu yaşamadı. Onların heç biri bugünkü kimi özünü qalib hiss etmədi.

Antik yunanların “aqora”sından üzü bəri meydanlar cəmiyyətlərin həyatında ciddi transformasiyalara şahidlik edib. Elə yaxın tarixlərdə dünyanın böyük şəhərlərinin böyük meydanlarının tarixi həm də o ölkələrin siyasi, ictimai inkişafının da tarixi olub: Moskvadakı Qırmızı meydan, İstanbuldakı Taksim meydanı, Pekindəki Tiananmen meydanı, Londondakı Trafalgar meydanı, Qahirədəki Təhrir meydanı kimi.

Azadlıq meydanı da bunlar kimi siyasi, ictimai mübarizələrin verildiyi, qazanıldığı, uduzulduğu məkan olub. Təkcə müstəqillik uğrunda yox, həm də siyasi hakimiyyət uğrunda mübarizəyə səhnə olub. İqtidar üçün səhnədən enməməyin, müxalifət üçün səhnəyə çıxmağın rəmzi mənasına çevrilib.   

Meydanlar aid olma məkanlarıdır. Bir yerə aid olduğunu, kimin tərəfində olduğunu, nəyə inandığını göstərməyin yoludur. 

Sosial şəbəkələrin taymlaynı kimidir. Vitrindir. Böyük böhranların məkanıdır. Böyük qələbələrin məkanıdır. Bölünməyin və döyüşməyin də, birləşməyin və barışmağın da yolu meydanlardan keçir. Bu gün Azadlıq meydanı bütün yolların birləşdiyi barış meydanı oldu. Belə də qalsın.

***

Parad zamanı Paşinyan xalqa müraciət edib deyəcək ki, onların paytaxtında bizim tanklarımız gəzir, onların küçələrində bizim toplarımız yeriyir.

Hacı Səfərov 

Deyilənə görə, Paşinyan özü parada gələ bilməyib, tank göndərib.

Həbib Müntəzir

Azərbaycan Avropa Məhkəməsinə əsirlərlə bağlı müraciət edib. Hazırda erməni əsirliyində 12 Azərbaycan hərbçisi var. 

Onlardan yeddi nəfərin adını araşdırıb müəyyən etmişəm. Maksimum paylaşaq ki, yaxınları, ailələrı xəbərsizdirsə xəbərdar olsunlar:

1. Yevlax şəhər sakini Baxşəliyev Emin Zahir oğlu

2. Ağstafa rayon sakini Musayev Amin Alim oğlu

3. Hacıqabulun Ağacanlı kənd sakini Abdinov Yəhya Vüqar oğlu

4. Şəmkirin Dəllər Cırdaxan kənd sakini Əliyev Şərif Elsəvər oğlu

5. Gəncə şəhər sakini Ələkbərov Ömər Teymur oğlu

6. Yevlaxın Marzılı kənd sakini Yolçuyev Nurəddin

7. Gəncə şəhər sakini Kərimov Bayram Yaşar oğlu

Günel Təhməzzadə 

TV-də ekranda sağ tərəfdə şəhidlərin adlarının əlifba sırası ilə düzülüşündə adam fərqinə varır 2783 rəqəminin nə qədər böyük olduğunu. Hər hərf ekranda nə qədər müddət davam edir. Arasında atamız, qardaşlarımız, sevgilimiz olmadığına görə sevinirik, sonra sevinc hissinə görə də xəcalət keçiririk. Bu periodda keçirdiyimiz qarışıq hisslər qədər heç vaxt keçirməmişdik yəqin.

Mübariz Örən 

AzTV-də Zəfər paradı öncəsi veriliş gedir, artistlər yuxarı başda əyləşdirilib, qalib ordunun Müzəffər əsgərləri isə arxada - ikinci planda sözükəsik qalıblar. Ayıbdı...

Cavid Qara 

Prezidentin İrəvan Zəngəzur Göyçə ilə bağlı dedikləri bizim tariximizdir və soydaşlarımızın,  bu gün isə vətəndaşlarımızın haqlarıdır. Bu ərazi iddiası deyildi. Cümlələr düşünülmüş qurulmuşdu. Və düşməni qorxuda saxlamağa, ağlını başına toplamağa, ərazi iddialarından bir dəfəlik əl çəkməsinə hesablanıb.

Şəmil Sadiq 

Deyir ki, medala və Milli Qəhrəman adına layiq olanların siyahısı təqdim edilmişdi, biz də üzərində işləyib, sənədləri toplayırdıq. 052 igidlərinə bəzi məlumatları, nailiyyətləri, igidliklərini bir də özlərinin dilindən eşidib yazmaq üçün zəng etmişəm. Təqribən bir neçəsinin cavabı belə oldu.

1. Mən yatıram, yorulmuşam, nə istəyirsən yaz da, mən deyim...

2. Mən nə etmişəm ki, şəhid olan qardaşlarımızı yazın, onlar can qoyub, məni boş ver...

3. Mən işimi görmüşəm, nə böyük işdir ki.. Qəhrəman qazilərimiz var, onları yazın sağlamlıqlarını itiriblər, onlara daha çox stimul olar...

Bunlar əsil igidlərdir, sadə, təvazökar, əsil vətənpərvər!

Azad Nuriyev

Əsgərim nizamlı, əsgərim cəsur
Düşməni yox edir, düşmən qan qusur.
Güclüdür, əzmli, qüdrətli ordum
Onlara arxadır, dayaqdır yurdum.

Hər yerdə - quruda, suda, havada
Dünyaya salacaq daim səs-səda,
Addımı titrədir yerin oxunu 
Hər bir zərbəmizin zəfərdir sonu.

Aygün Əhmədova 

Bu gün Zəfər paradına bacım qızı Əsranı da aparmışdıq. Koronavirusu nəzərə alıb elə bizə yaxın tərəfdə, adamların az olduğu yerdə dayanıb izlədik. Əsra 10 aylıqdır və ancaq "Gəl ey" deyir. "Gəl ey" deyə-deyə də əsgərlərə baxırdı, əlindəki bayrağı yelləyirdi. Hərbi maşınlar yanımızdan keçəndə, yüksək səslə siqnal verirdilər. Yavaş-yavaş gedən hərbi maşındakı əsgərlərdən biri Əsranı gördü və yanındakı maşını sürənə əli ilə çox balaca uşaq olduğunu, siqnalı saxlamağı işarə etdi. Çox güman ki uşağın qorxacağını düşündüyü üçün bu addımı atdı. Əsgərlərimiz təkcə qələbələri ilə deyil, həm də hər addımları, jestləri ilə qürurlandırırlar.