ABŞ sanksiyalarına baxmayaraq Huawei-in gəliri artır
Huawei-in sədri şirkətin ötən ildə gəlir və mənfəət artımı göstərdiyini və ABŞ hökumətinin sanksiyalarını sərtləşdirməsinə baxmayaraq gözləntilərə çatdığını bildirib. Xatırladaq ki, 2019-cu ildə Huawei o zamankı ABŞ prezidenti Donald Tramp tərəfindən ticarət üçün qara siyahıya əlavə edilib.
2020-ci ildə isə sanksiyalar sərtləşdirilib. Nəticədə Huawei yalnız üçüncü tərəf istehsalçılarından çip almaq deyil, həm də KSM prosessorlarını TSMC kimi Amerika texnologiyalarından istifadə edən şirkətlərin müəssisələrində istehsal etmək imkanlarından məhrum edilib.
TED.az xəbər verir ki, Huawei hansısa təhlükəsizlik təhdidi yaratdığını dəfələrlə təkzib edib.
Eyni zamanda, şirkət Çin hökuməti üçün məlumat topladığı barədə şayiələri də təkzib edib. Bu ay Huawei-in qurucusu və icraçı direktoru Ren Zhengfei ABŞ-ın yeni prezidenti Cozef Baydenin administrasiyasının Huawei ilə iş görmək istəyən ABŞ şirkətlərinə qarşı daha açıq bir siyasət aparacağını ümid etdiyini söyləyib.
Huawei sözçüsünün sözlərinə görə, şirkət 2020-ci il maliyyə hesabatlarını mart ayından etibarən dərc edəcək.