Martın 3-də Təhsil Nazirliyi və “Microsoft” şirkəti arasında keçirilmiş onlayn tədbirdə birgə təhsil layihələri üzrə əməkdaşlığın davam etdirilməsi barədə niyyət sənədi imzalanıb. Təhsil naziri Emin Əmrullayev və "Microsoft" korporasiyasının vitse-prezidenti Antoni Salkito tərəfindən imzalanan sənədin məqsədi tərəflər arasında təhsil sahəsində əməkdaşlığı genişləndirmək və birgə innovativ layihələrin icrasını təmin etməkdir. 

Niyyət sənədi çərçivəsində 4 istiqamət üzrə birgə fəaliyyətin aparılması nəzərdə tutulub: Təhsildə rəqəmsal liderlik və siyasətin formalaşdırılması, tədris və öyrənmə, rəqəmsal mühitin formalaşdırılması, təhsilalan və məktəbin uğuru. 

Maraqlıdır, sənəddəki istiqamətlərə əsasən, tədrisin uzun müddət distant qaydada davam etməsi gözlənilirmi?

HƏMÇİNİN OXU: Microsoft Təhsil Nazirliyi ilə razılığa gəldi – Nələr gözlənilir?

Mövzu ilə bağlı TED.az-a danışan təhsil eksperti Elçin Əfəndi xatırladıb ki, Birləşmiş Millətlər Təkilatı və digər beynəlxalq təşkilatların ümumi proqramı açıqlanıb: "Orada 2030-cu ilə qədər dünya ölkələrinin əksəriyyətinin distant təhsil sisteminə keçid etməsinin zəruriliyi qeyd edilib. Hətta artıq prosesin daha da tezləşdirilməsi üçün addımlar atılır. Ümumi götürsək, yaxın gələcəkdə distant formalı təhsil qaçılmazdır. Ölkəmizin tamamilə distant təhsilə keçəcəyini deyə bilmərəm. Ənənəvi təhsil yalnız müəyyən şəxslər üçün saxlanılacaq. Yəqin ki, gələcəkdə bu şəxslərin kateqoriyası müəyyənləşəcək. Amma təhsilin distant qaydada davam etdirilməsi yaxın 8-10 il ərzində tam həyata keçiriləcək. Prezident İlham Əliyev də təhsil haqqında sənədlərin elektron qaydada verilməsi barədə sənəd imzalayıb. Bütün bunlar tədricən oflayn təhsildən onlayna keçidi labüdləşdirir. Gələcəkdə demək olar, yalnız distant tədrisdən yararlanacağıq".

Ekspert vurğulayıb ki, sözügedən sənəddən təhsil sisteminin elektronlaşdırılması, informasiyalaşdırılması, eyni zamanda əlçatanlığının təmin olunması, informasiya texnologiyaları istiqamətində inkişaf etmiş müasir insan modelinin yaradılması kimi nəticələrə gəlmək olar: "Qurumlar hansısa təhsilalan haqqında ətraflı məlumat istəyirsə, uzun proseslərə ehtiyac yoxdur. Bütün təhsil məlumaları göz önündə olacaq. Bütün bunları gələcəyin planlaşdırılması, dünyanın xilası adlandıra bilərik. Təhsil almaq arzusunda olan hər kəs üçün bu mümkün olacaq. Vacib olan isə informasiya texnologiyaları ilə tam təminatdır".

Lamiyə SÜLEYMANLI