N.Tusi adına Şamaxı Astrofizika Rəsədxanasında “Herbiq Be tipli AS 310 ulduzunun fotometrik və spektral müşahidələri” mövzusunda astroseminar keçirilib.

Bu barədə TED.az-a rəsədxanadan məlumat verilib. Bildirilib ki, seminarda professor Nəriman İsmayılovun mövzu üzrə məruzəsi dinlənilib. O, spesifik xassələrə malik HBe tipli AS 310 ulduzunun rəsədxanada yerinə yetirilmiş uzunmüddətli fotometrik və spektral müşahidələrinin nəticələrini şərh edib. Bildirilib ki, 2016-2021-ci illər ərzində BVRİ zolaqlarında ulduzun parlaqlığının və rənglərinin dəyişməsi təhlil edilib. Ulduzun parlaqlığının dəyişmə amplitudu ildən-ilə hamar şəkildə dəyişib və maksimuma 2018-ci ildə çatıb. İlk dəfə göstərilib ki, ulduzun parlaqlığı azaldıqca rəngi qızarır, bu da parlaqlığın dəyişməsində tozun mühüm rol oynadığını göstərir. Statistik Furye analizinə görə, istər ayrı-ayrı illər ərzində alınan nəticələr üzrə, istərsə də bütün müşahidə massivi əsasında dəyişmələrin periodik komponenti aşkar edilmir.

Məruzədə rəsədxananın MUAGS+Andor kompleksində alınmış spektral materialın işlənmə metodikası geniş şərh olunub.

Sonra seminar iştirakçılarının sualları cavablandırılıb.