“Onlayn qaydada bilet satışında son 2 il ərzində artım müşahidə olunur. Ötən ilin statistikasına əsasən, ümumilikdə 33 314 sərnişin onlayn qaydada bilet əldə edib. 2019-cu ilin 8 ayı ərzində isə ümumilikdə 24 060 sərnişin avtovağzala gəlmədən internet vasitəsilə bilet alıb”, – bunu TED.az-a açıqlamasında Bakı Beynəlxalq Avtovağzal Kompleksinin mətbuat katibi Pərvin Məmmədova deyib.

Pərvin Məmmədova bildirib ki, avtovağzalın saytının yenilənməsindən və mobil tətbiqin istifadəyə verilməsindən sonra onlayn qaydada bilet alanların sayında artım müşahidə olunur: “Son 3 ay (iyun, iyul, avqust) ərzində 13 mindən çox sərnişin onlayn qaydada bilet alışı üçün müraciət edib. Onlayn bilet alan şəxs səfərinə 30 dəqiqə qalmış avtovağzala yaxınlaşaraq onlayn bilet üçün nəzərdə tutulan kassaya yaxınlaşaraq bileti rəsmiləşdirməlidir”.

P.Məmmədova qeyd edib ki, Bakı Beynəlxalq Avtovağzal Kompleksində 2013-cü ilin noyabr ayından başlayaraq onlayn bilet satışına start verilib: “Onlayn qaydada bilet almaq istəyən sərnişinlər səfər tarixinə 10 (on) gün qalmışdan 1 (bir)  gün əvvələ qədər “avtovagzal.az” saytı və mobil tətbiq vasitəsilə əldə edə bilərlər. Onlayn qaydada bilet alan zaman qeydiyyatdan keçən şəxs özündən başqa digər sərnişinə bilet alarsa mütləq həmin sərnişinin şəxsiyyət vəsiqəsindəki məlumatları düzgün şəkildə qeyd etməlidir. Bir şəxsiyyət vəsiqəsi ilə yalnız bir bilet əldə etmək mümkündür”.

Zeynəb ƏKBƏR