Xaricdə təhsil üzrə Dövlət Proqramına sənəd qəbulu zamanı hər üç təhsil səviyyəsi üzrə müsabiqədən azad olan təbəqə mövcuddur.

TED.az xəbər verir ki, bunu Dövlət Proqramı İdarəetmə Qrupunun rəhbəri Turan Topalova "Təhsil TV"-nin canlı yayımında deyib.

O bildirib ki, bakalavr təhsil səviyyəsində Beynəlxalq olimpiadalarda hər üç səviyyə üzrə qalib olan şəxslər birbaşa Dövlət Proqramına qəbul olma imkanı əldə edirlər.

"Magistratura və doktorantura təhsil səviyyəsində müraciət edən namizədlər əgər "Yüksəliş" müsabiqəsinin qalibidirlərsə, onlar da sənədlərini düzgün şəkildə təqdim etdikdən sonra birbaşa Dövlət Proqramına qəbul olma imkanı qazanırlar",- deyə o əlavə edib.

Qeyd edək ki, 2025-2026-cı tədris ili üçün "Gənclərin xarici ölkələrin nüfuzlu ali təhsil müəssisələrində təhsil almalarına dair 2022-2028-ci illər üçün Dövlət Proqramı" çərçivəsində dünyanın nüfuzlu universitetlərinin bakalavriat, magistratura və doktorantura səviyyələri üzrə sənəd qəbuluna aprelin 10-dan start verilib.