Birinci Xəzər İqtisadi Forumu çərçivəsində beynəlxalq konfrans, “Xəzər innovasiya texnologiyaları” sərgisi təşkil olunub.

TED.az xəbər verir ki, forum iqtisadiyyatın müxtəlif sahələrində, eləcə də nəqliyyat və logistika, sənaye, turizm, energetika, ticarət sahələrində yeni texnologiyalar, xidmətlər və həllərlə tanışlıq, həmçinin işgüzar münasibətlərin qurulması üçün mühüm platforma rolunu oynayır.

Sərgidə Türkmənistan, Qazaxıstan, İran və Rusiya ilə yanaşı Azərbaycan da milli pavilyonla təmsil olunub. Qeyd edilən tədbirlərdə Nəqliyyat, Rabitə və Yüksək Texnologiyalar Nazirliyinin nümayəndə heyəti iştirak edir. Milli pavilyonumuzda Nəqliyyat, Rabitə və Yüksək Texnologiyalar Nazirliyinin İnnovasiyalar Agentliyi, Məlumat Hesablama Mərkəzi, “Bakı Beynəlxalq Dəniz Ticarət Limanı” QSC-nin son innovativ məhsul, xidmət və həlləri nümayiş etdirilib.

Türkmənistan və Tatarıstan prezidentlərinin, eləcə də Azərbaycan, Rusiya və Qazaxıstanın Baş nazirlərinin də iştirak etdiyi forumda NRYTN İnnovasiyalar Agentliyinin İdarə Heyətinin sədri Tural Kərimli ən son innovasiyalar, həyata keçirilən layihələrlə bərabər "Virtual cərrahiyyə" layihəsi haqqında da danışıb.

Qeyd edək ki, İnnovasiyalar Agentliyinin Biznes İnkubasiya və Akselerasiya Mərkəzinin rezidenti olan “Virtual cərrahiyyə” startapı müasir texnologiyaların tətbiqi ilə daha dəqiq və effektiv cərrahi əməliyyat modelinin hazırlanmasına xidmət edir. Adıçəkilən layihə bütün dövlət rəsmilərinin xüsusi marağına səbəb olub.