Azərbaycan Milli Elmlər Akademiyası Mərkəzi Elmi Kitabxanasının (MEK) “Vikipediya” Metodik Mərkəzinin könüllüləri tərəfindən “Vikipediya”da Milli qəhrəmanlarımız haqqında müxtəlif dillərdə məqalələr yaradılır.

MEK-dən TED.az-a verilən məlumata görə, artıq Milli qəhrəmanlar Elbrus Allahverdiyev, Aytəkin Məmmədov və Araz Səlimov haqqında ingilis dilində məqalələr platformaya yerləşdirilib.

Məqalələrdə Milli qəhrəmanların həyatı və keçdikləri döyüş yolu barədə ətraflı məlumat verilir.

İngilis dilindəki “Vikipediya”da, həmçinin müstəqil Azərbaycan Respublikasının Silahlı Qüvvələrinin ilk hərbi təyyarəçisi, Qarabağ müharibəsi şəhidi Vaqif Qurbanov haqqında məqalə də yer alıb.

Bundan başqa, MEK-in “Vikipediya” Metodik Mərkəzinin təşəbbüsü ilə Yeni Azərbaycan Partiyasının (YAP) Gəncə şəhər təşkilatında yaradılan “Vikipediya” Metodik Mərkəzinin könüllüləri tərəfindən Gəncə ilə bağlı məqalələrin zənginləşdirilməsi prosesi davam etdirilir.

“Vikipediya”nın Azərbaycan dili bölməsində Gəncənin tarixi, həmçinin Cuhudlar, Ozan, Çaylı, Daş körpü, Aşıqlar, Səfərabad, Dördyol, Dəmirçilər və İmamlı məhəllələri haqqında məqalələr yaradılıb.

Məqalələrdə qədim məhəllələrin məşhur şəxsləri, tayfaları və sakinlərin məşğuliyyətləri haqqında maraqlı məlumatlar yer alıb.

“Vikipediya”da bu istiqamətdə məqalə yaradılması prosesi davam edir.