Mayın 27-də pis hava şəraitindən dolayı SpaceX şirkətinin uçuşu ləğv edilən Falcon9 raketi bu gün start götürəcək. 

TED.az Türkiyə mətbuatına istinadən xəbər verir ki, uçuş Bakı saatı ilə 23:22-də gerçəkləşdiriləcək. 

SpaceX Demo-2 olaraq adlandırılan bu tarixi addım NASA astronavtları Doug Hurley və Bob Behnkeni Falcon 9 raketinə quraşdırılan Crew Dragon kosmik gəmisi ilə birgə Beynəlxalq Kosmik Stansiyaya (BKS) daşıyacaq. 

Qeyd edək ki, NASA-nın 1986 və 2003-cü ildəki insan həyatı bahasına başa gələn kosmik missiyalarından sonra qurumun insanlı uçuş proqramlarına son verilmişdi. Ancaq Elon Musk sahibi olduğu SpaceX şirkəti vasitəsilə bu vəziyyəti dəyişməyə çalışır. 

NASA artıq SpaceX-də 48 astronavtı BKS-yə aparacaq 12 kosmik uçuş üçün 2,5 milyard dollarlıq rezervasiya edib. Yəni adambaşına SpaceX-ə 50 milyon dollar ödəniş ediləcək. Hazırda NASA Rusiyaya adambaşına uçuş üçün 80 milyon dollar ödəyir. 

Əlavə məlumat üçün bildirək ki, bir neçə dəqiqə sonra həyata keçiriləcək uçuş NASA-nın YouTube kanalında canlı yayımlanacaq.