AZ

Azərbaycanda məhkəmə prosesi videokonfransla aparılacaq — QANUN 

 

107720604_579842796234015_1817963261159720558_n
13.07.2020 15:45

“Azərbaycan Respublikasının Cinayət-Prosessual Məcəlləsində dəyişikliklər edilməsi haqqında” Azərbaycan Respublikasının Qanunu Azərbaycan Respublikası Prezidentinin “Məhkəmə-hüquq sistemində islahatların dərinləşdirilməsi haqqında” 2019-cu il 3 aprel tarixli Fərmanı ilə verilmiş tapşırıqların icrası çərçivəsində hazırlanıb.

 

TED.az xəbər verir ki, qanunun məqsədi cinayət mühakimə icraatında müasir informasiya-kommunukasiya texnologiyalarının üstünlüklərindən istifadə edilməsini, habelə xüsusi karantin rejimində və digər xüsusi hallarda cinayət prosesinin videokonfrans əlaqə vasitəsilə davam etdirilməsini təmin etməkdir. 

 

Qanun bütövlükdə cinayət mühakimə icraatında innovativ üsullardan istifadə etməklə effektivliyin yüksəldilməsi, məhkəməyə müraciət etmək imkanlarının genişləndirməsi, habelə süründürməçilik və sui-istifadə hallarının qarşısının alınması məqsədi ilə hazırlanıb.

 

Qanunda nəzərdə tutulan yeniliklər aşağıdakılardır: 

 

- cinayət mühakimə icraatının “Elektron məhkəmə” informasiya sistemi vasitəsilə aparılması qaydası müəyyən olunur;

 

- cinayət prosesi iştirakçılarının məhkəmə və istintaq orqanına gəlmədən videokonfrans əlaqə sistemindən istifadə etməklə prosesdə iştirakı prosedurları tənzimlənir;

 

- cinayət mühakimə icraatının məhkəmə protokollarında tam və hərtərəfli əks etdirilməsi məqsədilə məhkəmə iclaslarının fasiləsiz audio yazısının aparılması tələbi əks etdirilir; 

 

- iqtisadi sahədə olan cinayətlərə görə zərərçəkmiş şəxslə barışma, ziyanın ödənilməsi və dövlət büdcəsinə ödəniş edilməsi şərti ilə cəzadan azad etmənin qaydası nəzərdə tutulur; 

 

- məhkəmə icraatı uzadılmadan hazırlıq iclasında cinayət təqibinə xitam verilməsi imkanları genişləndirilir; 

 

- kassasiya şikayəti (protesti) verilməsi müddətləri qısaldılır, habelə onların verilməsi və baxılması qaydası təkmilləşdirilir; 

 

- xarici dövlətlərin məhkəmələrinin hökmlərinin və ya digər yekun qərarlarının tanınması üzrə icraatın aparılması qaydası müəyyən edilir. 

 

Qeyd edək ki, qanun cari ilin iyulun 15-dən qüvvəyə minir.

e-Azərbaycan bölməsindən digər xəbərlər

Daha çox