"Yeni ödənişli avtomobil yolunun 30 kilometrlik hissəsi yekunlaşmaq üzrədir. Artıq həmin ərazidə ödəniş terminalları, buraxılış məntəqələri quraşdırılır".

Bu sözləri TED.az-a açıqlamasında Azərbaycan Avtomobil Yolları Dövlət Agentliyinin (AYDAA) İctimaiyyətlə əlaqələr şöbəsinin rəhbəri Anar Nəcəfli ölkəmizdəki ödənişli avtomobil yolları barədə danışarkən deyib.

A.Nəcəfli bildirib ki, hazırda ölkəmizdə ödənişli yol təcrübəsi yoxdur:  "İlk belə yolun yeni inşa olunan Bakı-Quba-Rusiya Federasiyası ilə dövlət sərhəd avtomobil yolunun olması nəzərdə tutulub. Həmin yolun tikintisi 2021-ci ildə başa çatacaq. Təxmini 30 kilometrlik hissəsi isə yekunlaşmaq üzrədir. Artıq həmin ərazidə ödəniş terminalları, buraxılış məntəqələri quraşdırılır. Sözügedən 30 kilometrlik hissə istifadəyə verildikdə ödənişli olması nəzərdə tutulub. Bununla bağlı müvafiq qurumlarla birgə müzakirələr aparılır. Ödənişin məbləği bu müzakirələrdən sonra bəlli olacaq".

Qurum rəsmisi qeyd edib ki, avtomobil yolu üçün ödəniş məsafəyə görə hesablanacaq: "Yük və minik maşınları üçün ödəniş fərqli olacaq. Yük maşınları çox, minik avtomobilləri isə daha az ödəniş etməli olacaqlar".

Lamiyə SÜLEYMANLI