Məlum olduğu kimi, Nəqliyyat, Rabitə və Yüksək Texnologiyalar Nazirliyi yanında ''Bakı Taksi Xidməti'' MMC tərəfindən Bakıya müasir standartlara cavab verən 100 ədəd elektrikli "London taksi"ləri gətirilib.

“London taksiləri dünən təqdim olunub. Yəqin ki, bu gün az sayda (təxminən 10 ədədi) fəaliyyətə başlayıb. Bakı Taksi Xidməti MMC-nin taksilərinin xidmət haqqı məsafədən asılıdır. Bakıya yeni gətirilən taksilər premium səviyyəli taksilərə daxildir, komfort avtomobillərdir. Digər avtomobillərimiz ekonom sayılır, standartdır. Əlavə məlumat üçün “Bakutaxi” tətbiqimizi yükləyərək tanış ola bilərsiniz”.

Bunu TED.az-a açıqlamasında “Bakı Taksi Xidməti” MMC Reklam və Marketinq departamentinin Baş mütəxəssisi Natavan Səyidzadə deyib.

N.Səyidzadə bildirib ki, yeni taksiləri “1000” nömrəsinə zəng etməklə və “Bakutaxi” mobil tətbiq vasitəsilə sifariş etmək mümkündür.

Nəzərinizə çatdıraq ki, şirkətə məxsus “Bakutaxi” tətbiqində xidmət haqqı avtomobil növünə görə (standart və ya komfort) müəyyən edilir. “Bakutaxi” tətbiqini Play Store və App Store-da endirmək mümkündür.

Fatimə ZÜLFİQAR