AZ

Bu startaplar xeyli gəlir qazana bilərlər – “Bazardakı boşluğu çoxu görür, amma...”

120195211_1212218569140773_4969791486636659409_n
24.09.2020 12:45

“Hazırda trend xidmət sektorları üzrə startap yaratmaq deyil. Əsas olan startaplara dəstək olacaq startapın mövcudluğudur”.

 

Bu sözləri TED.az-a açıqlamasında Peşəkar startapının təsisçisi Nail Seyidov deyib.

 

O, Azərbaycanda əsas boşluqların müşahidə olunduğu startap mühiti barədə danışarkən bildirib ki, ölkəmizdə artıq əksər xidmət sektorları üzrə startaplar yaradılıb və fəaliyyətə başlayıblar: “Sadəcə yeni yarandıqları üçün bazarı bir müddət sonra dolduracaqlar. Hələlik müəyyən kəsrləri var. Hazırda trend xidmət sektorları üzrə startap yaratmaq deyil. Əsas olan startaplara dəstək olacaq startapın mövcudluğudur. Bu, data analizi ilə bağlı ola bilər. Çünki bütün yeni yaradılan şirkət və startaplara data lazım olur. Bununla onlar öz fəaliyyətlərini tənzimləyə, gələcəklərini qura bilirlər. Ölkəmizdə data sahəsinin çatışmazlıqları çoxdur. Kibertəhlükəsizlik sektorunda startap yaradılsa, həm digərlərinə dəstək olar, həm də öz fəaliyyətini yaxşı istiqamətə aparar və xeyli gəlir qazanar. Üçüncü ən yararlı sahələrdən biri isə oyun sektorudur. Məsələ dəfələrlə qabardılsa da hələ ki, dirçəlmədən söz gedə bilməz. Bu istiqamətli startaplar ölkəmizdə xeyli uğur qazana bilərlər”.

 

Onun sözlərinə görə, startapçıların bu sektorlara təşviq edilməsi üçün real tədbir indiki vəziyyətdə mümkünsüzdür: “Virtual maarifləndirmə işləri aparıla, bu sahələr üzrə boşluqlar göstərilə bilər. Bəlkə, çox bacarıqlı gənclər bunu boşluq kimi görmürlər, yaxud bazardan lazımi qədər geri dönüş ala bilməyəcəklərini düşündükləri üçün çəkinirlər. Bu mövzular üzrə maarifləndirmə işləri aparılsa, data, kibertəhlükəsizlik üzrə boşluqlar qabardılsa, insanlar bu istiqamətə yönələr. Oyun üzrə boşluq olduğunu isə çoxları görür. Sadəcə developerlərin olmaması marağı azaldır. İlk növbədə ölkədə yaxşı developerlər yetişdirilməli, daha sonra yaxşı maarifləndirmə işlərinə üstünlük verilməlidir”.

 

Lamiyə SÜLEYMANLI 

Startaplar bölməsindən digər xəbərlər

Daha çox