“Yaxın 1 il ərzində telefon bazarında Xiaomi modellərinə üstünlük veriləcək. Çünki bütün detalları ucuzdur”.

Bu sözləri TED.az-a açıqlamasında telefon satışı üzrə mütəxəssis İlkin Quluzadə  deyib. 

O, yaxın bir il ərzində Azərbaycanda trend olacaq telefon modelləri barədə danışarkən bildirib ki, hazırda ən çox alınan telefonlar Xiaomi Note 9 və 9C modelləridir: “Bunlardan başqa, kütləvi şəkildə alınan smartfon görməmişəm. Fikrimcə, elə yaxın 1 il ərzində də Xiaomi modellərinə üstünlük veriləcək. Çünki onların bütün detalları ucuzdur”.

İ.Quluzadə vurğulayıb ki, ümumiyyətlə, telefon modellərini əsasən qiymət və RAM-ı trendə çevirir: “Çünki insanlar məhz bu kateqoriyalara görə seçim edirlər. Məsələn, Samsung A71-in RAM-ı 6, yaddaşı isə 128-dir. Sözügedən smartfonun qiyməti 900 manatdır. Amma Xiaomi Note 9 Pro eyni - 6 RAM,128 GB yaddaş göstəricilərinə malik olsa da, qiyməti 500-600 manat civarındadır. Yəni, qiymətlərində bu qədər fərq olsa da, göstəriciləri oxşardır. Üstəlik, Xiaomi smartfonunun çəkilişi də Samsung-la müqayisədə yaxşı səviyyədədir. İnsanlar RAM-a çox üstünlük verirlər. Oyun sektorunun da telefon trendlərinə təsiri çoxdur. Məsələn, trend modelləri alanların 90%-i isə PUBG oynayanlardır”.

Onun fikrincə, növbəti ildə düyməli telefonlar da trend ola bilər: “Belə olsa, yəqin, bu modellərə yeni funksiyalar əlavə olunacaq. Çünki hazırda gün ərzində ən azı 20 nəfər Nokia 1202 modelini istəyir. Çoxu deyir, qiyməti nə qədər olsa da, ödəniş etməyə razıyam, təki mənim üçün ondan bir dənə tapın. Bunun nə ilə bağlı olduğunu bilmirəm. Bəlkə də, insanlar artıq telefonlardan bezməyə başlayıblar və bu yaxın vaxtlarda özünü büruzə verəcək”.

Lamiyə SÜLEYMANLI