Son statistik məlumatlara görə, dünyada onlayn ödənişlərin sayı sürətlə artmaqdadır. Mütəxəssislərin fikrincə, bu prosesə təkan verən əsas amillərdən biri də koronavirus pandemiyası oldu. Bəzi hallarda onlayn əməliyyat apararkən mobil telefon nömrəsi mütləq istifadə olunur. 

Maraqlıdır, internet vasitəsilə telefon nömrəsinin sahibi haqqında hansı məlumatları öyrənmək mümkündür? 

"Mobil nömrə üzərindən onun sahibinin kimliyi haqqında ancaq mobil operatorlarda məlumat olur. Bank hesabları, bank kartları və s. kimi məlumatlar isə uyğun olaraq başqa bir qurumda saxlanılır. Bu məlumatların bir yerdə kəsişdiyi məkan yalnız ödəniş sistemləri, mobil bank, dövlət portalları və s. ola bilər. Yəni məlumat itkisi, ya operator tərəfindən, ya bank, ya da şəxsin onları qeyd etdiyi və saxladığı müxətlif servislərdən ola bilər. Bu informasiyalar kiber cinayətkarlar tərəfindən hansısa bir bazalarda yığılıb ümumiləşdirilib sonradan satıla bilər".

Bunu TED.az-a açıqlamasında informasiya təhlükəsizliyi üzrə mütəxəssis Fərid Zeynalov deyib.

"Bundan əlavə SS7 və ya SİM kartın duplikatının çıxarılması kimi mürəkkəb hücum növləri mövcuddur. Bunlar da əsasən məhz bank kartlarından pulların oğurlanması üçün istifadə olunur.

Məlumatların ələ keçirilməməsi üçün istifadəçi digər hallarda olduğu kimi öz fərdi, həssas məlumatlarını mümkün qədər heç yerdə qeyd etməməlidir. Əgər edirsə, həmin servislərin leqitim və təhlükəsiz olmasını araşdırmalıdır. Eyni zamanda, həmin servislərin mövcud təhülkəsizlik mexanizmlərindən istifadə etməlidir", - deyə mütəxəssis qeyd edib.

Zeynəb ƏKBƏR