WhatsApp-ın istifadəçi şərtlərini dəyişməsi çoxlarının ondan üz döndərməsi ilə nəticələndi. Bu, istifadəçilərin tələblərini daha qabarıq göstərdi.

Maraqlıdır, WhatsApp skandalı mobil tətbiq bazarında nələri dəyişəcək?

Mövzu ilə bağlı TED.az-a danışan mütəxəssis Nail Seyidov bildirib ki, WhatsApp illərdir, istifadə etdiyi dataları istifadəçilərə açıqlamağa  məcbur olub: "Çünki Avropa birliyi ölkələrində keçərli GDPR və digər bəzi ölkələrin gizlilik qanunları bunu tələb etdi. WhatsApp sadəcə təqdimatda yanlışa yol verdi. Öncədən istifadəçilərə bir xəbərdarlıq etsə, açıqlama versəydi, onların gözü qorxmazdı. Amma birbaşa bildiriş göndərməklə istifadəçidə çaşqınlıq yaratdı. Düşünürlər ki, şəxsi məlumatları Feysbuk üzərindən paylaşılacaq. Nəticədə çox insan WhatsApp-ı tərk edib alternativ tətbiqlərə keçdilər. Sadəcə WhatsApp bunu gec dərk etdi".

Onun fikrincə, bu, mobil tətbiq bazarına da təsir edəcək: "Bundan sonra mesajlaşma platformaları və digər mobil tətbiqlər müştəriyə təqdimat mövzusunda daha diqqətli olacaqlar. Öz gizlilik qanunlarına riayət edəcək, hansısa dəyişiklik olduqda müştəriyə bunun təqdimatını daha yumuşaq formada edəcəklər. Bu tip dəyişikliklər gözlənilir. Əsasən, Avropa ölkələrində insanlar fərdi məlumatların gizliliyinə bizimlə müqayisədə daha çox önəm verirlər. Bizdə isə kütlənin bir hissəsi bunu bilərəkdən, bəziləri isə anlamadan edir. Artıq bu şəxslər də gizlilik mövzusunda daha diqqətli olacaqlar. WhatsApp kimi belə böyük tətbiqin bu cür yanlış etməsi digər tətbiqlərin səhvə yol vermə ehtimalını da aradan qaldırdı. Çünki insanların illərdir istifadə etdiyi belə geniş xidmətin başına bu gəlirsə, kiçik xidməti daha pis aqibət gözləyir. Sadəcə WhatsApp-ı silmək insanlar üçün çətin olduğuna görə, proses ləng getdi".

O vurğulayıb ki, həm Android, həm də iOS tətbiqlər müəyyən icazələr tələb edir: "Yalnız bu icazələrdən sonra tətbiq fəaliyyətə başlayır. Həmin icazələr nə qədər minimum olsa, bu, marketinq yönümlü olar. Bundan sonra çox tətbiq qaydalara riayət edəcək. Təbii, müəyyən icazələr almaq məcburdur. Məsələn, WhatsApp kimi tətbiqə kontakt və galereyaya icazə verməsək, o öz funksiyasını yerinə yetirə bilməz. Sadəcə bunlar nə qədər minimum tutulsa və istifadəçiyə dataları götürmək barədə xəbərdarlıq edilsə, daha çox istifadəçi cəlb edəcək. Əgər tətbiqi ödənişsiz istifadə ediriksə, bu zaman satılan bizim datalarımızdır. Sadəcə çox insan bunu anlamağa çətinlik çəkir. WhatsApp-ı ödənişsiz istifadə ediriksə, o da haradansa gəlir əldə etməlidir".

Lamiyə SÜLEYMANLI