“Qisas” əməliyyatı vaxtı Ermənistandan Azərbaycana kiberhücumların sayı məlum olub

23.11.2022 12:20

Azərbaycan Ordusu tərəfindən bu ilin avqust ayında keçirilən “Qisas” antiterror əməliyyatı zamanı Ermənistan tərəfindən Azərbaycana DDoS hücumlar olub.

TED.az Xüsusi Rabitə və İnformasiya Təhlükəsizliyi Dövlət Xidmətinin yaydığı məlumata istinadən xəbər verir ki, bu barədə qurumun cari ilin III rübü ilə bağlı yaydığı hesabatda bildirilib.

“Ən böyük həcmli DDoS hücumu “Qisas” antiterror əməliyyatları zamanı düşmən ölkə tərəfindən həyata keçirilmiş DDoS hücumlar olub. Belə ki, həmin DDoS hücumların həcmi 40 Gbps - 137 Gbps qədər artmış sorğu sayı isə saniyədə 19,000,000 pps həddinə çatıb. 8 gün davam edən DDoS kiberhücumları ümumilikdə 78 informasiya resursunu (15-i dövlət) hədəf alsa da “AzStateNet” istifadəçiləri olan 11 dövlət informasiya resursunun fasiləsiz fəaliyyət göstərməsi tərəfimizdən təmin edilib”, - deyə hesabatda bildirilib.

Çap et