Azərbaycan Respublikasının Gənclər Fondunun dəstəyi, Azərbaycan Dövlət Pedaqoji Universiteti (ADPU) və “PR Point Baku”-nun tərəfdaşlığı və “Gənclərin Maarifləndirilməsinə Dəstək” İctimai Birliyinin təşkilatçılığı ilə 9 dekabr 2025-ci il tarixində “Youth Spark” proqramının ilk görüşü ADPU-da keçirilib.

Yeni başlayan bu proqram universitet tələbələrinin yaradıcılıq potensialını gücləndirmək, onların şəxsi inkişafını dəstəkləmək və praktiki biliklərlə zənginləşdirmək məqsədi daşıyan çoxşaxəli inkişaf təşəbbüsüdür.

Görüşün əvvəlində ADPU-nun Tədbirlərin təşkili və tələbələrlə iş şöbəsinin müdiri Turan Kərimli və “Gənclərin Maarifləndirilməsinə Dəstək” İctimai Birliyinin sədri Aynurə Ələkbərli çıxış edərək proqramın əhəmiyyəti və hədəfləri barədə iştirakçılara məlumat veriblər.

“Youth Spark” proqramının açılış görüşü iki əsas istiqamətə fokuslanmış spiker sessiyaları ilə davam edib.

İlk olaraq, “Sevilart” brendinin təsisçisi Sevil Əhmədovanın “Yaradıcıllığımı biznesə necə çevirdim?” adlı təlimi ilə görüşə start verilib.Sevil Əhmədova öz şəxsi təcrübəsinə əsaslanaraq yaradıcılıqdan biznesə keçid prosesindən, brend quruculuğundan, həmçinin gənclərin bu yolda qarşılaşa biləcəyi çətinliklər və onları aşma yollarından danışıb. Onun çıxışı tələbələr üçün həm motivasiya, həm də real nümunələrlə zəngin praktiki bələdçilik olub.

İkinci təlim isə Mirşahin Əlizadə tərəfindən keçilən “Tələbələr üçün effektiv öyrənmə modeli” adlı təlim olub. Müzakirə öyrənmə metodları, zaman idarəetməsi, psixoloji hazırlıq və məlumatın effektiv qavranılması mexanizmləri üzərində qurulub. Mirşahin Əlizadə tələbələrin akademik həyatında tətbiq edə biləcəyi praktik alətlər haqqında dəyərli tövsiyələr verib.

“Youth Spark” proqramı çərçivəsində növbəti mərhələlərdə müxtəlif mövzularda seminarlar, praktiki workshoplar, mentorluq görüşləri və inkişaf yönümlü təlimlərin keçirilməsi nəzərdə tutulur. Proqramın məqsədi gənclərin təhsil, yaradıcılıq və karyera istiqamətlərində dayanıqlı inkişafını təşviq etməkdir.

“Gənclərin Maarifləndirilməsinə Dəstək” İctimai Birliyi və “PR Point Baku”nun birgə əməkdaşlığı ilə layihə müxtəlif universitetlərdə davamlı olaraq keçiriləcək.