Ali təhsil müəssisələrində təhsil alan hər kəs səbirsizliklə təhsil haqqında diplomu əldə edib karyera fəaliyyətinə başlamaq haqqında düşünür. Ancaq tez-tez eşitdiyimiz "işbazlar tərəfindən verilən saxta diplomlar" ifadəsi həm sənədin sahibini, həm də işə götürənləri tərəddüdə salır.

Təhsil haqqında sənədin həqiqiliyini yoxlamaq istəyirsinizsə artıq bunun üçün Təhsil Nazirliyinə müraciət edib vaxt itkisinə yol verməyə ehtiyac yoxdur.

“TEDassistant” rubrikasında bu dəfə “Diplom haqqında məlumatlar” elektron xidməti ilə bağlı məlumat verəcəyik.

Vətəndaşların rahatlığı üçün hazırlanan elektron Azerbaycan Portalında bu elektron xidmət də mümkündür. TED.az olaraq heç yerə yollanmadan sadəcə kompüterin qarşısında əyləşib bir neçə dəqiqə ərzində təhsil sənədinin həqiqiliyinin onlayn yoxlanmasının yollarını sizə təqdim edirik:

Əvvəlcə onu qeyd edək ki, elektron arayışda sənədin nömrəsi, verilmə tarixi, vətəndaşın tam adı, doğum tarixi, qəbul olduğu ixtisas, həmçinin bitirdiyi təhsil müəssisənin adı, ixtisası, fakültə, təhsil pilləsi, təlim dili, təhsil müəssisəsinə daxil olduğu və bitirdiyi illər, diplomun seriya nömrəsi, növü və s. məlumatlar öz əksini tapır.

Vaxt itirmədən prosesin necə həyata keçdiyinə nəzərə salaq:

• “Elektron hökumət” portalına (www.e- gov.az) daxil olun;

• “Bütün xidmətlər” bölməsini seçin;

• Təhsil Nazirliyi tərəfindən təqdim olunan elektron xidmətlərin siyahısından “Diplom haqqında məlumatlar” elektron xidmətini seçin;

• Açılan pəncərədə diplomun seriya və nömrəsinə görə axtarış etmək üçün ad, soyad, ata adının birinci hərfini və diplomun seriya və nömrəsini daxil edin;

• “Göstər” düyməsindən istifadə etməklə diplom barədə məlumatı əldə edə bilərsiniz.

Təhsil sənədi haqqında məlumat əldə etmək üçün növbəti üsul isə FİN nömrəsi ilə məlumatları əldə etməkdir.

“FİN” axtarış düyməsini seçdikdə sistemə heç bir məlumat daxil edilmir. Sistem qeydiyyatdan keçmiş istifadəçini identifikasiya etdiyindən FİN nömrəsi avtomatik olaraq ekranda əks olunur. Sadəcə "Göstər" düyməsini seçməklə diplom haqqında məlumatı ekranda görmək mümkündür.

Qeyd edək ki, bu üsulla 2011-ci ildən bu günədək olan diplomlar haqqında arayış əldə etmək mümkündür.

Günel QURBANOVA