Son vaxtlar səs-küy salan “Ghosty” (Ghosty for İnstagram) proqramı görə bilmədiyimiz profillərə gizlincə baxmağa şərait yaradır. “Saman altdan su yeridən”lərin məkanı olan bu proqram mənfi rəyləri ilə trend oldu.

TED.az olaraq həmin proqramın iş prinsipini araşdırdıq.

“Ghosty” İnstaqram hekayələri və paylaşımlarına əlavə tətbiq vasitəsi ilə baxmağa imkan verən proqramdır.

“Ghosty for Instagram” proqramı həm Android, həm də iOS təminatlı cihazlar tərəfindən dəstəklənir. Android cihazları üçün proqramın istifadəsinə limit qoyulub: gün ərzində yalnız bir istifadəçinin məxfi hesabı görünə bilər. iOS istifadəçiləri üçün bu limit aradan qaldırılıb.

Məxfi hesabdakı fotoları görmək üçün izləyicilərinizdən birinin həmin şəxsi izləməsi və bu proqram istifadəçisi olması lazımdır, əks təqdirdə hesab açılmayacaq, gizli olaraq qalacaq.

““Ghosty” proqramı məxfilik siyasətini bir çox məqamda pozur. İnstaqramın özündə  belə gizlilik və məxfilik siyasəti var və biz qeydiyyatdan keçərkən bu qaydalarla razılaşırıq. İndi isə belə bir proqramın mövcudluğunu öyrənirik və sosial şəbəkə tərəfindən destəklənməsi sual yaradır”, – bunu TED.az-a SMM üzrə ekspert Türkan Əkbərli deyib.

T.Əkbərlinin fikrincə, sözü gedən proqram istifadəçi hüquqlarını birbaşa pozur: “Mən istifadəçi olaraq şəxsi hesabımı gizli tutmaq istəyirəmsə, İnstaqramın digər şəxlər tərəfindən buna əksini həyata keçirməyə izin verməsi heç doğru deyil. Proqramın bu funksiyası istifadəçi hüquqlarını birbaşa pozur”.

SMM mütəxəssisi proqramın yalnız bir yönünə müsbət rəy bildirib: ““Ghosty”nin yaxşı tərəfi, sadəcə, bəzən saxta hesabların aşkar edilməsində yardımçı ola bilməsidir. Hazırda feyk profillər olduqca çoxdur və proqram onlarla mübarizədə effektiv ola bilər”.

Fatimə ZÜLFİQAR