Məşhur elektron ticarət şirkəti Amazon əməkdaşlarının TikTok tətbiqindən istifadələrinə qadağa qoyub. 

TED.az-ın Türkiyə mətbuatına istinadən məlumatına görə, şirkət bu qərara nəyin səbəb olduğu barədə açıqlama verməyib. 

Məlumata görə, şirkət əməkdaşlarının cib telefonlarında və ya Amazon e-poçtlarına giriş üçün istifadə edilən digər cihazlarda TikTok istifadəsinə icazə vermir. 

Onu da qeyd edək ki, əməkdaşların notbuk vasitəsilə TikTok-a girişində hansısa problem olmadığı qeyd olunur. 

Məsələni şərh edən TikTok əməkdaşlarından biri Amazon-un bu addımının səbəbinin naməlum olduğunu söyləyib. 

Fast Company-yə danışan tətbiq təmsilçisi göndərdiyi e-poçtda "istifadəçi təhlükəsiziliyi TikTok üçün böyük önəm daşıyır; istifadəçilərinin gizliliyinə sayğı duymaqda qərarlıyıq" sözlərinə yer verib. 

Təmsilçi onu da bildirib ki, Amazon-un narahatlığı anlaşılan deyil. Qarşılaşdıqları problemin həlli üçün məmnuniyyətlə dialoqa gedə bilərik. 

Qeyd edək ki, gənclər arasında, xüsusən populyar olan TikTok, Çinin ByteDance şirkətinə məxsusdur. Son aylarda təhlükəsizlik məsələsində hökumətlərin artan təzyiqi və yoxlamaları ilə qarşı-qarşıya qalan tətbiq bir neçə ölkədə, o cümlədən bir neçə gün əvvəl Hindistanda yasaqlanıb. ABŞ adminstrasiyası isə tətbiqin milli təhlükəsizliyi təhdid etdiyi düşüncəsindədir.