AQTA bu sahibkarlar üçün onlayn iclas keçirdi

13.07.2020 19:58

Azərbaycan Respublikasının Qida Təhlükəsizliyi Agentliyi (AQTA) respublika ərazisində meyvə-tərəvəz məhsullarının istehsalı və ixracatı ilə məşğul olan fiziki və hüquqi şəxslər üçün onlayn iclas keçirib.

Agentlikdən TED.az-a verilən məlumata görə, iclasda 60-dan çox istehsalçı və ixracatçı ilə yanaşı, Kənd Təsərrüfatı Nazirliyi yanında Aqrar Xidmətlər Agentliyinin rəhbəri Seymur Mövlayev və Azərbaycan Meyvə-Tərəvəz İstehsalçıları və İxracatçıları Assosasiyasının sədri Bəşir Quliyev də iştirak edib.

Bitki sağlamlığı şöbəsinin müdiri, respublikanın baş dövlət fitosanitar müfəttişi Xəyalə Dadaşova iştirakçılara ölkənin fitosanitar vəziyyəti, istehsal və ixrac olunan məhsullar, istixanalarda becərilən tərəvəzlər, ölkələrin ixrac olunan məhsullara fitosanitar tələbləri, zərərli orqanizmlərə qarşı elmi əsaslara söykənən məhvedici tədbirlər, fitosanitar sertifikatların verilməsi qaydaları barədə məlumat verib. Ölkənin fitosanitar vəziyyətinin sabit saxlanılmasında, eləcə də imicinin qorunmasında sahibkarların rol oynadığını qeyd edib. Artıq istixanalarda mövsümi olaraq məhsul yığımının başa çatdığı, sağlamlaşdırıcı tədbirlər üçün şərait yarandığı və hər bir sahibkar tərəfindən bu kimi məsələlərə diqqətlə və məsuliyyətlə yanaşılmasının vacibliyi vurğulanıb.

İclasda sahibkarlara verilən dəstək və təlimatlar əsasında işlər daha səmərəli qurdulduğundan istehsal və ixracda yüksək nəticələrin əldə olunduğu diqqətə çatdırılıb. Digər ölkələrdən müasir cihaz və avadanlıqların alınaraq ölkəyə gətirildiyi, yüksək keyfiyyətli preparatlarla xidmətlərin həyata keçirildiyi, bu sahədə baş verən yeniliklərə dair bilik və bacarıqlarının artırılması məqsədilə mütəxəssislərin ötən il bir sıra ölkələrə ezam olunduğu barədə məlumat verilib. Hazırda istehsal və saxlanma sahələri, dənli və paxlalı bitkilərlə yanaşı, yaş meyvə tərəvəz məhsullarının zərərli orqanizm ərinin zərərsizləşdirilməsində də nailiyyətlər əldə olunduğu vurğulanıb.

Çap et