Samsung Electronics Çində yerləşən son kompüter istehsalı zavodunun fəaliyyətini dayandırmaq niyyətindədir.

TED.az xəbər verir ki, Samsung, Çində işçi qüvvəsinin qiymətinin artması, ABŞ-Çin ticarət müharibəsi və pandemiyanın istehsalat sahəsinə təsiri fonunda istehsal-satış zəncirlərini yenidən nəzərdən keçirir.

Bu qərar Samsung Electronics Suzhou Semiconductor (SESS) Sənaye parkında müqavilə əsasında işləyən 1700 işçiyə dəlalət edəcək. 

Məlumata görə, zavodda 2012-ci ildə 4,3 milyard ABŞ dolları həcmində məhsul istehsal olunub və tədarük edilib, lakin 2018-ci ildə obyektin tədarük həcmi 1 milyarda qədər azalıb.

Samsung-un mətbuat katibi zavodun istehsal həcmi barədə məlumatı şərh etməkdən, həmçinin əməkdaşların işdən çıxarılması barədə ətraflı məlumat verməkdən imtina edib. 

"Çin Samsung üçün əhəmiyyətli bazar olaraq qalır. Çin istehlakçıları üçün yüksəkkeyfiyyətli məhsulların təqdiminə və xidmətlərə davam edəcəyik", — deyə şirkətin məlumatında deyilir.

Qeyd edək ki, Samsung şirkəti ötən il Çində yerləşən son smartfon zavodunun fəaliyyətinə son qoyub.