"Universitet ehtiyacı olan bir qism tələbəyə daxili ehtiyatları hesabına kompüter verib".

Bu sözləri TED.az-a açıqlamasında Xəzər Universitetinin IT departamentinin direktoru Fərid Musayev deyib. 

O, Xəzər Universitetinin pandemiyadan sonra rəqəmsal xidmətlər istiqamətində gördüyü işlər barədə danışarkən bildirib ki, Azərbaycanda ilk olaraq bu ali təhsil müəssisəsində 4 il öncə tətbiq edilən MS Office 365 platforması pandemiya dövründə tam olaraq öz potensialını göstərib: "Bütün tələbələrimizi korporativ (universitetin) e-mail ilə təmin etdik və Microsoft şirkətinin təqdim etdiyi resurslardan həm universitet, həm də tələbələr təmannasız istifadə edirlər. Müəllim və tələbələr onlara verilən e-mail sayəsində 10 kompüter üçün MS Office 365 proqramlarında lisenziya ilə bağlı pulsuz abunə haqqı qazanıblar. Bundan əlavə, tələbələr tədris matrialları və şəxsi məlumatları üçün Onedrive-da 2 TB-lik bulud saxlancı ilə təmin olunublar".

Həmçinin bildirilib ki, tədris MS Office 365 platformasına aid Microsoft Teams proqramı üzərində aparılır: "Universitet tərəfindən ehtiyacı olan bir qism tələbələrə universitetin daxili ehtiyatları hesabına kompüterlər verilib. IT departamenti tələbələrin şəxsi kompüterlərində optimizasiya və sazlanma işləri görüb. Onlayn tədris üçün hər hansı bir texniki problem yaranmayıb. Tələbələrlə  IT departamenti sıx əməkdaşlıq edir və yaranmış problemlərin aradan qaldırılmasında aktiv kömək edirlər. Bu cür dəstək müəllim heyyəti üçün də göstərilir. Cari ilin iyul-avqust aylarında universitetin IT infrastrukturu növbəti tədris ilinin onlayn dərsləri üçün tam hazır vəziyyətə gətirilib. Departament olaraq hər tələbə və işçiyə texniki dəstək göstərməkdən məmnunuq".

Lamiyə SÜLEYMANLI