Koronavirus pandemiyasına görə Azərbaycanlı tələbələrin dərsləri onlayn formada tədris olunacaq.

Təhsil eksperti Kamran Əsədov bildirir ki, hazırda kolleclərdə oxuyanların 80%-dən çoxu bölgələrdən olan tələbələrdir. Və onların müəyyən hissəsinin kompüteri, interneti, planşeti yoxdur. 

Bu isə həmin tələbələrin onlayn dərslərə qoşulmasına böyük əngəl yaradır. 

Bəs mövcud problemi necə aradan qaldırmaq olar? 

Bununla bağlı TED.az-a danışan Bakı Mühəndislik Universitetinin prorektoru Elçin Süleymanov bildirib ki, sadəcə texniki imkanların yaxşılaşdırılması və bu istiqamətdə problemi olan tələbələr müəyyənləşdirilərək onlara yardım edilə bilər: "Misal üçün Tələbə Həmkarlar Təşkilatı xətti ilə bu cür problem yaşayan tələbələrə internet paketi hədiyyə oluna bilər. Eyni zamanda, onlara güzəştli internet paketini internet provayderləri də sosial məsuliyyət kampaniyası çərçivəsində təqdim edə bilər".

Elçin Süleymanov onu da qeyd edib ki, pandemiya ilə əlaqədar yuxarı siniflərin şagirdləri və kollec-universitet tələbələrinin təhsilinin onlayn şəkildə təşkilində məqsəd bu kateqoriyada olanların texniki biliklərinin, digər kateqoriyalara görə daha yüksək olmasından qaynaqlanır: "Yəni bir kollec tələbəsi tətbiqi və laboratoriya dərsləri istisna olaraq digər nəzəri dərsləri kitab və onlayn dərslərlə mənimsəyə bilər".

Xatırladaq ki, ötən həftə şagirdlərə onlayn tədris üçün planşetlər paylanılacaqmı sualına Təhsil naziri Emin Əmrullayev hər şagirdə planşet paylamaq düzgün qiymətləndirmə deyil, deyə cavablayıb.

Nazir bildirib ki, 40 min müəllimə internet paketi paylanılıb: “Özəl şirkətlərdən biri ilə əməkdaşlıq çərçivəsində biz müəllimlərin tədris prosesində problemsiz iştirakı üçün onlara internet paketləri təşkil etdik. Bununla biz onların tədris prosesini də izləmiş olduq. Lakin şagirdlərin internetə qoşulması üçün planşet paylanması real görünmür. Onların istifadə qaydasının izlənməsinə də gərək ola bilər. Düşünürəm ki, bu məsələ daha başqa formada qiymətləndirilməlidir”.

Zeynəb ƏKBƏR