“Təhsildə inkişaf və innovasiyalar üzrə IX qrant müsabiqəsinin qalib layihəsi olan “Yaşıl gələcək” qrant layihəsi çərçivəsində təlimlər davam edir.

Layihə çərçivəsində həyata keçirilən 5 aylıq proqramın ilk 3 ayı ərzində şagirdlər üçün “Bərpa olunan enerji mənbələri” mövzusunda nəzəri və praktik təlimlər təşkil olunub. İştirakçılar paralel və ardıcıl birləşmələr, müqavimət və gərginlik, günəş və külək enerjisi istiqamətlərində müxtəlif təcrübələr apararaq biliklərini praktik şəkildə tətbiq ediblər.

Təcrübələr vasitəsilə şagirdlər elektrik dövrələrinin qurulması və enerji mənbələrinin işləmə prinsiplərinin öyrənilməsi sahəsində praktik bacarıqlar qazanıblar. Onlar müşahidə aparmaq, nəticələri təhlil etmək və eksperimentlər vasitəsilə elmi nəticə çıxarmaq kimi tədqiqat bacarıqlarını inkişaf etdiriblər. Eyni zamanda layihə şagirdlərdə ekoloji düşüncənin formalaşmasına və bərpa olunan enerji mənbələrinə marağın artmasına töhfə verir.

Qeyd edək ki, “Yaşıl gələcək” qrant layihəsi çərçivəsində keçirilən təlimlər Şirvan şəhər ümumtəhsil müəssisələrindən seçilmiş 30 şagird üçün Şirvan STEAM Mərkəzində icra olunur. Layihənin əsas məqsədi bərpa olunan enerji mənbələrini və növlərini araşdırmaq, öyrənmək, bu sahədə fəaliyyət göstərəcək mühəndis və ixtisaslı kadrların formalaşmasına töhfə vermək, eyni zamanda məktəb yaşlı şagirdlərdə enerjidən səmərəli və davamlı istifadə vərdişlərini aşılamaqdır. Layihənin rəhbəri Əzəmi Səbinənin rəhbərliyi ilə həyata keçirilən 5 aylıq layihənin ilk 3 ayı ərzində şagirdlər üçün nəzəri və praktik təlimlər təşkil olunub.

Layihə rəhbəri Əzəmi Səbinə