Dünyanın hər yerindən WhatsApp messencerinin beta istifadəçiləri tətbiqlə bağlı problemlə qarşılaşıblar. Problem ondan ibarətdir ki, istifadəçilər qrup söhbətlərindən çıxarılır, əlbəttə ki, öz istəkləri ilə deyil. 

TED.az xəbər verir ki, bu haqda NewsBytes məlumat yayıb. 

İstifadəçilərin çoxu WhatsApp-da yaranmış problemlə bağlı Tvitterdə şikayətlənib. Onların sözlərinə görə, şəbəkədə baş vermiş xəta istifadəçilərin qrup söhbətlərindən birdən-birə yox olmasına səbəb olur. Bəziləri isə başqa bir üzvün mesaj göndərməsindən sonra qruplara qayıtdıqlarını vurğulayıblar. 

Eyni zamanda, bir neçə istifadəçi WhatsApp-da digər problemlərlə də qarşılaşıblar. Məsələn, hindistanlı Futurestic tətbiq vasitəsi ilə şəkil çəkə bilmədiyini bildirib. Problem yalnız messenceri v2.20.200.7 və v2.20.200.8 versiyalarına yeniləyən Android istifadəçilərini təsir edib. 

Qeyd olunur ki, tətbiqin köhnə bir versiyasını quraşdırdıqda mövcud problemdən qurtulmaq mümkündür.

WhatsApp şirkətinin nümayəndələri hələ yaranmış nasazlıqla bağlı heç bir açıqlama verməyiblər.

Xatırladaq ki, sentyabrın əvvəlində WhatsApp istifadəçilərinə kənar şəxslərdən mesajlar gəlməyə başlamışdı. Bu mesajlar mesenceri əngəlləyirdi. İstifadəçi telefonda bu mətni açanda tətbiq işləmirdi və istifadəçi onu yenidən qurmağa məcbur qalırdı. Bu mesajlarda WhatsApp-ın işləyə bilmədiyi simvollar mövcud idi.