AZ

“Bakı şəhəri üzrə avtomobil dayanacağının qiyməti 30 qəpikdən başlanmalıdır” - MÜTƏXƏSSİS 

120160382_408961937171609_1102255288376523152_n
23.09.2020 12:38

“Avtomobil dayanacağı ilə bağlı əsaslı problem paytaxtdır. Çünki burda həm əhali, həm də avtomobil sayı çoxdur. Avtomobil dayanacağı problemini həll etmək üçün ilk növbədə Bakı şəhərindəki nizamsız və qaydasız şəkildə həyata keçirilən tikinti məsələləri qaydasına salınmalıdır. Bu gün Bakı şəhərində tikinti özbaşnalığı hökm sürür. Elə məhz bu tikinti özbaşnalığı nəticəsində paytaxt şəhərdə avtomobil dayanacaqlarının təşkili problem yaradır”.

 

Bunu TED.az-a açıqlamasında nəqliyyat üzrə ekspert Eldəniz Cəfərov deyib. 

 

Eldəniz Cəfərov bildirib ki, dayanacaq problemini həll etmək üçün ilk növbədə Bakı şəhərindən tikinti məsələsinə xüsusi standart tətbiq edilməlidir: “Xüsusi tələblər tətbiq edilməlidir. Tələblər ondan ibarət olmalıdır ki, Bakı şəhərində və onun çevrəsində hündür mərtəbəli binaların tikintisi zamanı işçi və yaxud da sakinlərin sayına, hətta ondan artıq sayda dayanacaqların olması vacib bir şərt kimi irəli sürülməlidir. Bütün alış-veriş mərkəzləri, ticarət və biznes mərkəzləri və dövlət idarələrinin hamısına bu qərar tətbiq edilməlidir. Bu standart Bakı şəhərində tətbiq edilsə, az da olsa parklanma məsələsinin öhdəsindən gələ bilərik. Bu tələblərə cavab verə bilməyən şirkətlər binanın tikintisi zamanı, avtomobil dayanacağı məsələsini həll edə bilmirsə, zəhmət çəkib ticarət mərkəzi və binalarını şəhərdən kənarda tiksin”.

 

Mütəxəssis qeyd edib ki, Bakı şəhərinin əhalisi günü-gündən artır: “Təbii ki, nəqliyyat vasitələrinin sayı da artır. Bu gün bizə 10 dayanacaq yeri, sabah isə daha 20 avtomobil dayanacaq yeri açmaq lazımdır. Avtomobil dayanacağının ödənişli olması, əlbəttə ki, vacibdir. Sadəcə qiymətlər yüksək olmalı deyil. Simvolik qiymətlər olmalıdır, tənzimlənməlidir. Bu gün Bakı Nəqliyyat Agentliyi dayanacaqlarla bağlı xüsusi layihələr hazırlayır. Hətta modul tipli dayanacaqların hazırlanması ilə bağlı təklifləri var və bu layihə üzərində işlənilir. Görünür ki, müvafiq qurumlarla razılaşdırmalar aparılmalıdır. Amma buna baxmayaraq, dayanacaq məsələsində yenə də özbaşınalıq hökm sürür. Kim istəsə özü üçün yol kənarını zəbt edib orda avtomobilini park edir. Burda da qiymətlər təxminən 1 manat civarındadır və bu olduqca yüksək rəqəmdir. Qiymətlər belə olmamalıdır. Bakı şəhəri üzrə avtomobil parklanma qiyməti 30 qəpikdən başlanmalıdır, 30-50 qəpik civarında ola bilər. Amma bir manat olduqca yüksək rəqəmdir. Bu məsələyə də diqqət yetirilməlidir”.

 

“Onun da qeyd edim ki, Bakı şəhəri üzrə avtomobillərə tətbiq ediləcək, yeni müxtəlif parklanma qiymətlərin əleyhinəyəm. Avtomobil dayanacağının Bakı şəhəri üzrə fərqli qiymətdə olmağı düzgün deyil. Əgər qiymətlər eyni olmasa, o zaman bu müxtəlif manipulyasiyaya gətirib çıxaracaq”, - deyə E.Cəfərov əlavə edib. 

 

Zeynəb ƏKBƏR

TED + bölməsindən digər xəbərlər

Daha çox