“Bəzən şirkət onlayn marketinqin bütün xidmətlərindən istifadə etsə də, hesabatlılıq olmur. İşin biznes analitika tərəfi, hesabatlılıq mütləqdir”.

Bu sözləri TED.az-a açıqlamasında rəqəmsal marketinq üzrə mütəxəssis Əfsun Qurbanov deyib.

O, ölkəmizdə onlayn marketinqlə bağlı şirkətlərə ən çox lazım olan, amma marketoloqların gözlərindən qaçan məqamlar barədə danışarkən bildirib ki, hazırda bütün bu tip xidmətlərə ehtiyac var: “Ən başlıcası, ümumi rəqəmsal marketinq baxışı lazımdır. Əsas olan rəqəmsal marketinqin özünün xidmətidir. Məsələn, şirkətlər müstəqil SMM, Google Apps xidməti alsalar da, bir strateji boşluq var. Yəni, iş xaotik gedir. Rəqəmsal marketinq yanaşması, ümumiləşdirən mərkəzi koordinasiyanın mövcudluğu yaxşı olardı. Sosial media marketinqi, influencer marketinq, axtarış platformalarında reytinqin yüksəldilməsi, Google Adds və digər platformaların axtarış reklamları nəzərdə tutulur. Həmin reklamlar üzrə xidmətlərə ehtiyac var. Displey Netvork adlanan displey reklamların yer aldığı Google Adds və digər platformaların idarə edilməsində də boşluq hiss olunur. Kontent marketinq də belə sahələr sırasındadır. Bu, şirkətlərin böyüklüyü, gücü və büdcəsindən də asılıdır”.

Ə.Qurbanov vurğulayıb ki, biznes analitikə ehtiyac da çoxdur: “Bəzən şirkət onlayn marketinq xidmətlərinin hər birindən yararlansa da, hesabatlılıq olmur. Xərclənən pulun qarşılığında şirkət nə əldə edib? Satışa təsiri olubmu? Statistikalar necə inkişaf edib? Bunlara bir nəzarət mexanizmi yoxdur. Xidmət alarkən də buna çox diqqət etmirlər. İşin biznes analitika tərəfi, hesabatlılıq mütləqdir. İçə və çölə marketinq texnologiyalarından da yerində istifadə edilməlidir. Bundan əlavə, şirkətin mobil tətbiqi varsa, ona uyğun xidmətlər ala bilər”.

Ekspert boşluqları doldurmağın yollarını belə izah edib: “Şirkətin məvacib ödəmə gücü varsa, əməkdaş işə götürməli, mərkəzi nəzarəti içəridə qurmalıdır. Buna gücü çatmırsa, məsləhətçi köməyindən faydalana bilər. Amma nəzarət mütləqdir. Şirkətin bu istiqamətdə təcrübəsi yoxdursa, işi görən özü-özünü kontrol edə bilməz və nəzarət mexanizmi kənarda olmalıdır”.

Lamiyə SÜLEYMALI