Vətəndaş-məmur münasibətlərinin minimumlaşdırılması və daha sağlam prinsiplər üzərində qurulmasını təmin edən elektron xidmətlər bütün qurumlar üçün prioritet istiqamətlərdəndir.

Canlı aləmin varlığında böyük rolu olan və ikinci həyat adlandırılan “Su” ilə bağlı problemlərin daha tez və şəffaf şəkildə həll edilməsi, yüksək səviyyəli xidmətin təqdim olunması üçün bu sahədə elektron xidmətlərin mövcudluğu daha vacibdir.

“Azərsu” ASC-nin mətbuat katibi Anar Cəbrayıllının TED.az-a söylədiklərinə görə, hazırda qurum 19 elektron xidmət təklif edir: “Su sayğaclarının quraşdırılması, ploblanması, su borcunun internet üzərindən öyrənilməsi və ödənilməsindən tutmuş abonent məlumatlarının dəyişdirilməsi, ünvan məlumatlarının dəqiqləşdirilməsinə qədər bir çox xidmətlər elektronlaşdırılıb. Həmçinin vətəndaş abonent kodu, sayğac haqqında məlumatlar və fotoşəkil göndərməklə "Əhali qrupu üzrə istehlakçıların sayğac göstəricilərini təqdim etməsi və hesab fakturasının formalaşdırılması" xidmətindən yararlana, I qrup istehlakçılar tərəfindən su təchizatı və tullantı sularının axıdılması xidmətlərindən istifadəyə görə borcun olmaması haqqında arayışı elektron formada ala bilərlər”.

LİNK: “Azərsu” ASC-nin elektron xidmətlərinin tam siyahısı

Anar Cəbrayıllı su ilə bağlı müraciətlərin də elektronlaşdırıldığını bildirdi: “Borcun araşdırılması, su nümunələrinin yoxlanılması, sayğacların təmiri və yaxud nasaz sayğacların dəyişdirilməsi, tullantı sularının axıdılması sistemində baş vermiş qəza ilə bağlı müraciətlər elektron formada qəbul edilir”.

O, həmçinin bildirdi ki, bu elektron xidmətlərin bir çoxu yeni istifadəyə verilən Elektron Su Portalında (e-su.az) yerləşdirilib.

Günel QURBANOVA