Azərbaycanın hava hücumundan müdafiə sistemlərinin siyahısında yer alan TOR silahı  istənilən hava şəraitində aşağı və orta hündürlükdə uçuş həyata keçirən təyyarə, helikopter, qanadlı raket, yüksək dəqiqlikli idarəolunan raketlər, pilotsuz uçuş aparatları və qısa mənzilli ballistik raketlərə qarşı mübarizə aparmaq imkanına sahib olan özüyeriyən qısa mənzilli zenit-raket kompleksidir. Bu sistemin 3K95 Kinjal adı altında istehsal olunan dəniz variantı isə NATO tərəfindən SA-N-9 Gauntlet adlanır. 

 

TOR, həmçinin AGM-86 kimi yüksək dəqiqlikli idarəolunan raketləri gecə və gündüz, istənilən hava şəraitində və radioelektron mübarizə mühitində məhv etməyi bacaran ilk hava hücumundan müdafiə sistemi hesab olunur. 1980-ci illərdən silahlanmaya qəbul edilib. Postsovet məkanında ən mükəmməl HHM sistemlərindən hesab olunur.

 

 

 

 

Kompleksin modernizasiya edilmiş variantı olan Tor-M2 müxtəlif tipli döyüş vertolyotlarına və cəbhə aviasiyasına qarşı tətbiq edilmək üçün nəzərdə tutulub. Eyni vaxtda 4 hədəfə atəş aça bilər, atəş radiusu 10 metrdən 10 kilometrə qədər hündürlük, 15 kilometrə qədər məsəfədə təşkil edir. Kompleksin modernləşdirilmiş variantı ona hərəkətdə olanda da hədəfləri izləməyə və atəş açmağa imkan verir.  Buraxılış qurğusunda 16 döyüş raketi olur.

 

Bu ilin yanvar ayının 8-də yerli vaxtla saat 06:44-də İranın İslam İnqilabı Keşikçiləri Korpusunun HHM qüvvələrinə məxsus Tor M-1 raket sistemi tərəfindən Tehran İmam Xomeyni beynəlxalq hava limanından qalxan və Tehran-Kiyev reysini həyata keçirən Ukrayna Beynəlxalq Hava Yollarına məxsus Boeing 737-800 sərnişin təyyarəsi yerdən 2400 metr yüksəklikdə vurulub. Hadisə nəticəsində 176 nəfər, o cümlədən 9 nəfər heyət üzvü həlak olub. İran rəsmiləri hadisədən 3 gün sonra 11 yanvar tarixində hadisənin "insan səhvi nəticəsində" baş verdiyini etiraf edib.

 

 

 

 

Hazırda TOR zenit-raket kompleksi Azərbaycan, Rusiya, Belarus, Ermənistan, Yunanıstan, İran və bir neçə başqa ölkənin ordu arsenalında yer alır. 

 

 

TED.az TOR zenit raket kompleksinin xüsusiyyətlərini təqdim edir:

 

 

Ağırlığı: 34 ton

 

 

Sürət: 65 km/s

 

 

Əsas silah: 9M330, 9M331 raketi

 

 

Uzunluğu: 7.5 m

 

 

Eni: 3.3 m

 

 

Hündürlüyü : 5.1 m

 

 

Ekipaj: 3 nəfər