Ermənistanın bir neçə dəfə Abşeron, Xızı kimi ərazilərə atdığı raketlər Azərbaycanın Hava Hücumundan Müdafiə Qüvvələri tərəfindən zərərsizləşdirilib. Buna baxmayaraq, uzağı 300 kilometr məsafəni hədəf almaq gücündə olan raketin 500 kilometr uzaqlığa düşməsi çoxlarında təəccüb doğurur.

Həmçinin oxu: Ermənistan kimi quldur və terrorist ölkəyə hədiyyə edilən ballistik raket – Gəncəyə atılan  ELBRUS HAQQINDA

Mövzu ilə bağlı TED.az-a danışan hərbi ekspert Ramil Məmmədli bildirib ki, Elbrus raket sistemi maksimum 300 kilometrlik məsafəni hədəf ala bilir: “Həmin raket sistemi Ermənistan ərazisindəki Berd rayonu ilə Kəlbəcərin yaxınlığındakı bir məntəqə arasında yerləşir. Bu ərazidən hava yolu ilə Abşeron yarımadasına olan məsafə, əlbəttə ki, 300 kilometrdən çox deyil. Avtomobil yolu ilə hava məsafəsi eyni ölçülmür. Raket birbaşa hərəkət etdiyi üçün hava trayektoriyası daha qısa olur. Bu təbiidir. Hava Hücumundan Müdafiə qoşunlarımız bu zərbələrin qarşısını alırlar. Hazırda ordumuzun silahlanmasında S-200, S-300, Palorid tipli raket kompleksləri, “Dəmir qübbə” ZRK mövcuddur. Ermənistanın Toçka – U taktiki raket kompleksi 15, 7, 40, 120, Elbrus taktiki raket kopleksi 50-300, İsgəndər isə 50, 350, 400 kilometr məsafədən hədəfə zərbə endirmək imkanına malikdir”.

Hərbi jurnalist Rahib Qərib də raketlərin maksimal uçuş məsafəsinin 300-400 kilometr olduğunu, hava yolu ilə gəlib çatmasının mümkünlüyünü xatırladıb: “Bu taktiki raketlər yalnız ara-sıra lokal müharibələrdə istifadə edilir. Bu, müharibə cinayətidir. Müvafiq qurumlarımız beynəlxalq aləmə məsələ barədə məlumat veriblər. Hətta cinayət işi də açılıb. Prezident İlham Əliyev dəfələrlə vurğulayıb, bunlarda bu qədər pul hardandır? Onlar bahalı raketlərdir. Atılan raketləri, məhv edilən və qənimət kimi götürülən texnikanı toplasaq, bəlkə də, Ermənistanın iki illik büdcəsi edər. Deməli, himayədarlarının rolu var”.

Lamiyə SÜLEYMANLI