Teleqram, WhatsApp, Viber və s. kimi mesajlaşma tətbiqlərində məlumatların şifrələndiyi və SMS, eləcə də, e-poçtlardan fərqli olaraq daha təhlükəsiz olduğu bildirilir. 

Bununla bağlı TED.az-a danışan informasiya təhlükəsizliyi üzrə mütəxəssis Fərid Zeynalov bir servisin başqa birindən daha təhlükəsiz olduğu fikri ilə razı deyil: "Hansı tətbiqin digərindən təhlükəsiz olması anlayışı servisdə tətbiq olunan təhlükəsizlik mexanizmlərindən və onun istifadçilərinin təhlükəsizlik barədə məlumatlarından asılıdır. Məsələn, Telegram, WhatsApp və s. sistemlərdə şifrələnmə tətbiq olunursa, həmin şifrələnmə e-poçtda da quraşdırırlır. Yəni, həm sözü gedən servislər, həm də e-poçt, eyni qaydada məlumatların ötürülməsini və saxlanılmasını təhlükəsiz şəkildə təmin edə bilir".

Fərid Zeynalov qeyd edib ki, haker hücümları hər bir platforma üzərindən eyni vektor üzrə edilir: "Bu əsasən zərərli faylların göndərilməsi və ya onlara keçid, məlumat oğurlanması (phishing) kimi hücumlardır. Həmçinin eyni hücümlarda SMS göndərmək vasitəsilə həyata keçirilə bilər. Sadaladığınız bütün servislər məlumatın son çatdırılma nöqtəsinin birbaşa istifadəçi olmasını nəzərə alaraq bütün hücum növləridə hamısında demək olar eynidir. Bu səbəbdən də bu hücum vektoru kiber aləmdə, istər fiziki, istərsə də hüquqi şəxlər tərəfindən ən çox diqqət yetirilməsi tələb olunan istiqamətdir".

Zeynəb ƏKBƏR