Koronavirus pandemiyası şəraitində tədarüklərin əhəmiyyətli dərəcədə azalmasına baxmayaraq, Airbus ardıcıl ikinci il Boeing-i üstələyərək ən böyük təyyarə istehsalçısı olacaq.

TED.az xarici KİV-ə istinadən xəbər verir ki, ilin sonuna qədər Airbus 550-560 təyyarə tədarük edəcək. Bu, 2019-cu ilə nisbətən 35% azdır. Şirkət 2020-ci ilin yanvar-noyabr aylarında 477 təyyarə tədarükü reallaşdırıb. Eyni dövrdə Boeing cəmi 118 təyyarə istehsal edib.

Boeing-in tədarükünün azalması 737 MAX modelinin istehsalının dayandırılması ilə əlaqədardır. Onun istehsalı bu model təyyarələrin iştirakı ilə ardıcıl qəzaların baş verməsindən sonra dondurulub, uçuşlar isə qadağan edilib.

ABŞ-ın aviasiya tənzimləyicisi yalnız noyabrın 18-də 737 MAX təyyarəsinin istismara qaytarılmasına icazə verib və Boeing dekabrdan 737 MAX-ların tədarükünü bərpa edib.