Ov Məsələləri üzrə Koordinasiya Şurasının növbəti iclası keçirilərək 22 yanvar 2021-ci il tarixindən etibarən ov mövsümünün açıq elan edilməsinə qərar verilib.

Ovu sevən centlmenlər! Vəhşi heyvanlara ov üçün icazənin alınması məqsədi ilə artıq müxtəlif sənədlər toplamağa, zaman itirməyə ehtiyac yoxdu. Məsafələri qısaldan Elektron Hökumət portalı vasitəsilə asanlıqla müraciət edə bilərsiniz.

TED.az olaraq TEDassistant rubrikasında vəhşi heyvanların ovuna icazələrin alınması və müraciətin göndərilməsi qaydasından bəhs edəcəyik.

Sözügedən elektron xidmətdən istifadə etmək üçün www.e-gov.az – “Elektron Hökumət” portalına daxil olaraq Ekologiya və Təbii Sərvətlər Nazirliyi tərəfindən təqdim olunan elektron xidmətlər siyahısından “Vəhşi heyvanların ovuna icazələrin verilməsi üçün müraciətin və sənədlərin qəbulu” elektron xidmətini seçərək daxil olun. 

Qeydiyyat üçün açılan pəncərədə ünvan, ev telefonu, mobil nömrə, elektron ünvanı, şifrə, şifrənin təkrarı, təqdim olunan kodu daxil edilərək “İrəli” düyməsini seçin.

Növbəti mərhələdə fiziki və ya hüquqi şəxs olmanız və fəaliyyət növünüz barədə məlumatları daxil edin.

“Tələb olunan sənədlər” bölməsində elektron xidmətin göstərilməsi üçün ərizə forması, şəxsiyyət vəsiqəsi, ovçuluq və üzvlük bileti, ov silahının (odlu və ya soyuq) istifadəsinə dair Azərbaycan Respublikası Daxili İşlər Nazirliyinin müvafiq orqanları tərəfindən verilən icazə sənədini daxil edin. Bunun üçün “Choose File” düyməsindən istifadə etmək lazımdır.

Sonda isə təqdim olunan kodu və müvafiq qeydi daxil edərək “Göndər” düyməsini sıxın. 

Bununla da siz yaradılmış elektron müraciəti Ekologiya və Təbii Sərvətlər Nazirliyinin müvafiq qeydiyyat orqanına göndərmiş olacaqsınız.

Günel QURBANOVA