Bildiyimiz kimi, 4-11 avqust tarixlərində Azərbaycanda ilk dəfə 31-ci Beynəlxalq İnformatika Olimpiadası (BİO) keçiriləcək. TED.az məsələnin aktuallığını nəzərə alaraq Bakı Mühəndislik Universitetinin (BMU) kompüter və informasiya texnologiyaları kafedrasının baş müəllimi, Beynəlxalq İnformatika Olimpiadası ilə bağlı tanınmış mütəxəssis Etibar Seyidzadəyə suallar ünvanladı.

Etibar Seyidzadə açıqlamasında bildirdi ki, “Beynəlxalq İnformatika Olimpiadası (BİO) məktəb şagirdləri arasında informatika (proqramlaşdırma) üzrə hər il keçirilən ən nüfuzlu beynəlxalq yarışdır: “İlk belə olimpiada 1989-cu ildən keçirilib. Azərbaycan komandası isə 1994-cü ildən başlayaraq BİO müsabiqəsində iştirak edir. Müsabiqəyə qoşulduğumuz müddət ərzində müəyyən illərdə uğurlu çıxışlarımız da olub. Məsələn, komandalarımız 1996, 2004, 2011-ci illərdə bürünc 2003-cü ildə isə gümüş medal qazanıblar. Məncə, bu ilin 4-11 avqust  tarixlərində ölkəmizdə keçirilən  Beynəlxalq İnformatika Olimpiadası  informatika və İKT sahələrinin inkişafına mühüm töhfə verəcək. BİO müsabiqəsində uğurlu iştirak üçün ümumtəhsil məktəblərində müəyyən proseslər tələb olunur”.

Ekspert vurğuladı ki, BİO 2019-da Azərbaycan komandasından uğurlu çıxış gözləyir: “Son 4 ildə, həm Respublika rəhbərliyi, həm Təhsil Nazirliyi, həm də bir çox qurumlar tərəfindən bu sahəyə böyük dəstək göstərirlər. Azərbaycanda BİO yarışına ciddi və intesniv hazırlıqlar gedir. Məktəblilərdən ibarət komandalara yerli və əcnəbi mütəxəssislər tərəfindən təlimlər keçirilir. O cümlədən, komandalarımız bu yarışa qədər bir neçə beynəlxalq yarışlarda iştirak ediblər və artıq müsbət nailiyyətlər də var. İnanıram ki, heç olmasa gümüş medal qazanacağıq”.

E.Seyidzadə onu da qeyd etdi ki, bu gün informatika fənni müxtəlif məktəblərdə fərqli şəkildə tədris olunur: “Əsas, problemlərdən biri maddi texniki bazaların zəif olmasıdır. Məktəblərdə kompüter biliklərinin də az olduğunu qeyd etmək istərdim. Hesab edirəm ki, informatika fənni müəllimlərinin kitab üzərində bilik səviyyələri aşağıdır. Alqoritm sistemini zəif bilirlər.

Baxmayaraq ki, informatika fənni 1-ci sinifdən 11-ci sinifə qədər tədris olunur. Amma hələ də qəbul imtahanlarına salınmayıb. Buna görə də, məktəblərin çoxundabu fənn fəal keçirilmir. Hesab edirəm ki, kompüter bilikləri, IT ixtisasları bilikləri qəbul imtahanlarına  salınması zəruridir. Avropa ölkələrinin əksəriyyətində bu fənn qəbul imtahanlarında yer alır”.

Zeynəb ƏKBƏR