“Enterprise Azerbaijan” portalı və ABŞ-nin Nevada Universitetinin “Özmən Sahibkarlıq Mərkəzi” ilə birgə yaratdığı “StartUp School”un rəsmi açılışı aprel ayının 3-də keçiriləcək.

İqtisadi İslahatların Təhlili və Kommunikasiya Mərkəzindən TED.az-a bildirilib ki, qeydiyyat müddətində müxtəlif ölkələrdən müraciət edən 200 layihə arasından ekspertlər tərəfindən seçilən layihə “StartUp School”da aprel ayı boyunca treninqlərə qoşulacaq. Treninqlərin sonunda ekspertlər tərəfindən seçilən 9 layihə (komanda) SABAH.Labın İnkubasiya Mərkəzində 2 həftə ərzində mentorluq proqramına qatılacaq.

Mükafatlandırma mərasimdə xüsusi ekspertlər tərəfindən layihələr arasından ilk 3 yerin qalibi müəyyənləşdiriləcək.

Qalib layihələrə: I yerin qalibinə ABŞ-də I2B treninqdə iştirak imkanı; II və III yerlərin qaliblərinə Dövlət Məşğulluq Agentliyi tərəfindən dəstək; II və III yerlərin qaliblərinə “SABAH.lab”ın akselerasiya proqramında iştirak imkanı; seçiləcək layihələrin “Startap Şəhadətnaməsi” üçün müraciətinə KOBİA tərəfindən sürətləndirilmiş dəstəyin göstərilməsi; “Fintech” nominasiyasında seçilən komandaya “PAŞA Bank”da təcrübə keçmək imkanı veriləcək.

“StartUp School” layihəsinə qoşulmaq üçün müraciət edən amma seçilməyən layihələrə “Enterprise Azerbaijan” İnkubasiya Mərkəzində və tərəfdaş qurumların inkubasiya və akselerasiya mərkəzlərinə rezidentlik təklif olunacaq. Onların startaplarına biznes planının inkişafı, bazar araşdırması və əməliyyatların idarə edilməsinə dəstək göstəriləcək, yerli və xarici bazarlara asan çıxış təmin olunacaq.

Qeyd edək ki, İqtisadi İslahatların Təhlili və Kommunikasiya Mərkəzinin operatoru olduğu www.enterpriseazerbaijan.gov.az portalı Prezident İlham Əliyevin 2018-ci il 19 sentyabr tarixli “Qeyri-neft sektorunda rəqabətqabiliyyətli daxili istehsalın dəstəklənməsi ilə bağlı əlavə tədbirlər haqqında” Sərəncamına əsasən yaradılıb.