Koronavirusun yayıldığı və ondan sonrakı dövrlərdə, artıq bir stabilləşmə mərhələsinə daxil olduğumuz zaman da davamlı şəkildə tibb mütəxəssisləri tərəfindən belə fikirlər müzakirə olunurdu ki, “Koronavirusun müxtəlif mutasiyaları meydana çıxa bilərmi?”, “Bu mutasiyalar hansı istiqamətdə xəstəlik törədib?” və yaxud “Xəstəliyin gedişi hansı istiqamətdə ola bilər?”, “Bu prosesdə yenidən geri dönüş mümkündürmü?”.

Burada bir neçə variantlar nəzərdə tutulmuşdur. Təbii ki, koronavirus infeksiyasının pandemiyası zamanı biz proseslərin daha xoş ssenari üzrə getdiyinin şahidi olduq. Belə ki, mutasiyalar virusun daha çox xəstəliyin ağırlaşması istiqamətində yox, insan orqanizminin adaptasiyası və insan orqanizmində yuxarı tənəffüs yollarında rutin infeksiyaları törədiləcək şəkildə mutasiyasının şahidi olduq. Bu, müsbət ssenari idi və bundan sonra da təbii ki, müxtəlif mutasiyaların meydanaçıxma ehtimalı hər zaman var.

Bunu TED.az-a Milli Məclisin Səhiyyə komitəsinin üzvü Müşfiq Məmmədli son zamanlar dünyada koronavirus infeksiyasına yoluxma hallarının artması və bu virusun yeni ştamlarının qeydə alınmasına münasibət bildirərək deyib.

Hazırda müzakirə etdiyimiz “eris” mutasiyası da bir qədər riskli və bir qədər də yoluxma sayının artmasına səbəb olan mutasiyalardandır. Ona görə də biz bu prosesi izləməliyik və müvafiq əks epidemik tədbirlər görülməlidir. Prosesin gedişində onun hansı istiqamətdə getməsi barədə proqnozlar vermək olar.

Deputat bildirib ki, yoluxucu xəstəliklər Azərbaycanda nəzarət altındadır: “Amma havaların soyuması və xüsusən, pandemiyadan sonrakı dövrdə bu cür mutasiyaların meydana çıxması bizi bir qədər ehtiyatlı hərəkət etməyə məcbur edir. Bu baxımdan, dövlət orqanları da müvafiq tədbirlər görür. Ümumiyyətlə hazırda proses nəzarət altındadır. Gələcəkdə hər hansı artım müşahidə olunarsa, lazımi tədbirlər görülə bilər”.

Xatırladaq ki, Ümumdünya Səhiyyə Təşkilatının məlumatına görə son ay dünya üzrə yoluxanların sayı 38 faiz artıb. Avropada yoluxmada artım 39 faiz, Sakit okeanın qərbində 52 faiz, Aralıq dənizinin şərqində isə 113 faiz təşkil edir.

Hazırda ABŞ-da COVID-ə yoluxma 2020-ci ilin ilk pandemiyasının statistikasına yaxınlaşır. Bu ölkədə sutkada 650 mindən artıq yoluxma qeydə alınır. Ölüm halları avqustla müqayisədə 5 faiz artıb.