Azərbaycanda sistem əhəmiyyətli banklar SMS xəbərdarlıq tarifini gələn aydan 2.5 dəfə artıraraq 40 qəpikdən 1 manatadək çatdırmaq qərarı veriblər.

TED.az xəbər verir ki, bu barədə Milli Məclisin İqtisadi siyasət, sənaye və sahibkarlıq komitəsinin üzvü Vüqar Bayramov deyib.

"Əvvəllər 40 qəpik olan xidmət gələn aydan 1 manat olacaq. Bu cür artım faktiki olaraq qiymətlərin süni şəkildə qaldırılması və ya sektordakı vəziyyətdən istifadə deməkdir. Bu səbəbdən son zamanlarda nəinki rabitə tarifləri artmayıb, əksinə texnoloji innovasiyalar SMS xidmətinin dəyərini əhəmiyyətli dərəcədə ucuzlaşdırıb", - o deyib.

Bazar ertəsi ölkənin maliyyə bazarındakı mənbədən TED.az-a verilən məlumata görə, Azərbaycanda bir sıra banklar 2023-cü ilin dekabr ayından SMS xəbərdarlıqlarının qiymətlərini qaldıracaqlar.

Eyni zamanda, Unibank-dan TED.az-a verilən məlumata görə, bankın SMS xəbərdarlıqları üçün tarifləri dəyişməyib və gələn aydan tariflərin bahalaşdırılması planlaşdırılmır.

"Unibank-ın "UBank" mobil tətbiqində push xəbərdarlıq xidməti bir qayda olaraq, pulsuzdur. Digər sözlə desək, müştəri əməliyyatı öz kartı ilə icra edirsə, pulsuz bildirişlər dərhal "UBank" vasitəsilə göndəriləcək və bu xidmət sayəsində SMS vasitəsilə kart əməliyyatları barəsində bildiriş göndərməyə ehtiyac yoxdur",- deyə bankdan bildiriblər