“Azərbaycan Respublikasının Ağdərə rayonunun yaradılması haqqında” qanun layihəsinin müzakirəsi tarixi ədalətin və Azərbaycan xalqın pozulmuş hüquqlarının bərpa olunmasına yönəlib.

TED.az xəbər verir ki, bunu Milli Məclisin Regional məsələlər komitəsinin bu gün keçirilən iclasında “Azərbaycan Respublikasının Ağdərə rayonunun yaradılması haqqında” qanun layihəsinin müzakirəsi zamanı parlamentin Elm və təhsil komitəsinin sədri Bəxtiyar Əliyev deyib.

O qeyd edib ki, tarixi ədalətin bərpa olunması eyni zamanda bu torpaqlarda daim sülhün, tərəqqinin tərəfdarı olmuş, bu bölgənin inkişafına həmişə öz böyük töhfəsini vermiş və bu bölgədə bütün dövlərdə yaşamış Azərbaycan xalqının bu gün də sülhün və tərəqqinin təminatçısı və qarantı olduğunun bariz nümunəsidir.

“Ermənilər etnik təmizləmə apararaq daim çalışırdılar ki, Azərbaycanın torpaqlarına sahib çıxsınlar. İrəvanda, Göyçədə, Qərbi Zəngəzurda etnik təmizləmə apardılar. SSRİ hökuməti onlara havadar oldu, 48-53-cü illərdə yüz minlərlə azərbaycanlının dədə-baba torpaqlarından deportasiyası ilə bağlı SSRİ hökuməti qərar qəbul etdi. Xaricdə yaşayan ermənilər deportasiya edilmiş azərbaycanlıların evlərinə köçürülürdülər.

Azərbaycanlıları isə çox ağır şəraiti olan yerlərə köçürürdülər. Bizim arxivlərimizdə azərbaycanlıların SSRİ rəhbərliyinə ünvanlandığı məktublarını ürək ağrısı ilə oxuyuruq. Bu tarixi həqiqəti biz dünyaya çatdırmalıyıq”, - deyə o, əlavə edib.