Toronto Universitetinin və “Caltech”in tədqiqatçıları süni intellekt və 3D çap texnologiyalarından istifadə edərək titandan beş dəfə güclü, eyni zamanda, son dərəcə yüngül yeni nanomaterial hazırlayıblar. Bu innovativ materialın aerokosmik sənayedə, avtomobil və müdafiə texnologiyalarında inqilabi dəyişikliklər edə biləcəyi bildirilir.

TED.az “Live Science” portalına istinadla xəbər verir ki, tədqiqatçılar əvvəlcə materialın potensial həndəsi quruluşlarını simulyasiya edərək maşın öyrənmə alqoritminə ötürüblər. Alqoritm optimal dizaynları müəyyən edərək yükdaşıma qabiliyyətini maksimuma çatdırıb və stress konsentrasiyasını azaldıb. Nəticədə 3D çapla istehsal edilən nanolatikalar hər kiloqramkubmetr üçün 2,03 meqapaskal təzyiqə tab gətirə bilən misilsiz gücə malik olub.

Tədqiqatın həmmüəllifi, Toronto Universitetinin professoru Tobin Filleter bu materialın təyyarə, helikopter və kosmik gəmilərdə istifadəsinin uçuş zamanı yanacaq sərfiyyatını əhəmiyyətli dərəcədə azalda biləcəyini vurğulayıb. İlk müəllif, “Caltech” tədqiqatçısı Peter Serles isə bildirir ki, əgər təyyarələrdəki titan komponentlər bu yeni materialla əvəz edilsə, hər kiloqram üçün ildə 80 litr yanacağa qənaət edilə bilər.

Bu yenilik “Advanced Materials” jurnalında dərc olunub və gələcək hədəf materialın iri miqyaslı istehsalına uyğunlaşdırılmasıdır. Bu texnologiya avtomobil sənayesində də daha güclü və yüngül komponentlərin hazırlanmasına töhfə verə bilər.