Türkiyədə keçdiyimiz təcrübə mübadiləsi qardaş ölkənin kosmos, aerokosmik mühəndislik və bu kimi bir çox sahələri ilə yaxından tanış olmaqla yanaşı, praktiki biliklər əldə etməyimizə də faydalı oldu. Burada bir çox yeniliklər, o cümlədən kosmik sahə üzrə Türkiyənin ilkləri ilə yaxından tanış olmaq imkanı əldə etdik.

Bu sözləri TED.az-a müsahibəsində Azərbaycan Dövlət Neft və Sənaye Universitetinin (ADNSU) SABAH qrupları kompüter mühəndisliyi ixtisasının tələbəsi Mehbarə Heydərova söyləyib.

Tələbələrimizin iştirakı ilə Türkiyədə kosmos, aerokosmos, aviasiya, innovasiyalar, texniki elmlər, süni intellekt və mühəndislik sahələrində təcrübə mübadiləsində iştirak edən Mehbarə deyib: “Bu səfər mənim gələcəyə baxışımı formalaşdırır. Gələcək üçün ən böyük arzum kompüter mühəndisliyi üzrə savadlı bir kadr olaraq ölkəmin kosmik sahə üzrə inkişafına töhfə verməkdir. Bu imkanı bizə verən hər kəsə təşəkkür edirəm”.

Xatırladaq ki, Azərbaycan universitetlərinin tələbələri kosmos, aerokosmos, aviasiya, innovasiyalar, texniki elmlər, süni intellekt və mühəndislik sahələrində Türkiyədə təcrübə mübadiləsi keçirlər.

“Azərkosmos”un KOSMİK Akademiyasının təşkilatçılığı və Türkiyənin Gökmen Aerokosmik və Aviasiya Mərkəzinin (GUHEM-Gökmen Uzay ve Havacılık Merkezi) dəstəyi, eləcə də Azərbaycanın Elm və Təhsil Nazirliyi, Elm və Ali Təhsil üzrə Dövlət Agentliyi və SABAH qruplarının əməkdaşlığı ilə həyata keçirilən layihəyə üç şəhid və qazi övladı cəlb olunub.